Федераль дәүләт вузлары студентларын хәрби әзерләү: яңа мөмкинлекләр

2008 елның 6 мартында РФ Хөкүмәтендә “Югары һөнәри белемнең федераль дәүләт мәгариф учреждениеләрендә хәрби уку үзәкләре, хәрби укыту факультетлары һәм хәрби кафедралар турында” 275-р номерлы күрсәтмә дөнья күрде.

Федераль дәүләт югары уку йортларында гражданнарны хәрби әзерләү системасын үзгәртеп төзү кысаларында вузларда хәрби укыту факультетлары һәм хәрби кафедралар саны сизелерлек кими. Хәзерге вакытта гамәлдә булган 234 хәрби укыту факультеты, хәрби кафедра һәм хәрби һәм экстремаль медицина кафедрасының 70 % бетереләчәк. Федераль дәүләт вузларында бары тик 68 хәрби укыту факультеты һәм хәрби кафедра калачак.

Хәрби кафедрада запастагы офицерларны хәрби әзерләү программасы буенча укыту граждан Россия Оборона министрлыгы белән төзегән шартнамә нигезендә башкарыла.

Бер үк вакытта федераль дәүләт вузлары каршында 37 хәрби уку үзәге төзеләчәк.

“Югары һөнәри белемнең федераль дәүләт мәгариф учреждениеләрендә Россия Федерациясе гражданнарын хәрби әзерләү программалары буенча укыту турында” 2008 елның 6 мартындагы 152 номерлы РФ Хөкүмәте Карары нигезендә 2008 елның 1 гыйнварыннан югары һөнәри белемнең федераль дәүләт мәгариф учреждениеләрендә көндез уку рәвешендә белем алучылар, сәламәтлекләре буенча хәрби хезмәткә яраклы һәм контракт буенча хәрби хезмәткә алыну таләпләренә җавап бирә торган булсалар, Россия Оборона министрлыгы белән төзегән шартнамә нигезендә әлеге белем бирү учреждениеләре каршындагы хәрби уку үзәкләрендә хәрби әзерлек үтәргә хокуклы. Шартнамә гражданнар 24 яшькә җиткәнгә кадәр төзелә ала. Хәрби уку үзәгендә уку вакытында гражданга өстәмә стипендия түләнә. Уку тәмамланганнан соң гражданнар хәрби хезмәт үтү турында контракт төзергә тиеш. Контракт төзүдән баш тарткан очракта, ул үзенең әзерлеге өчен тотылган чараларны кайтарырга тиеш.  

Моның белән бәйле федераль дәүләт вузлары каршындагы хәрби уку үзкләрендә гражданнарны хәрби әзерләү тәртибен җайга сала торган Нигезләмә расланды. Россия Оборона министрлыгы, Россия Мәгариф һәм фән министрлыгы, шулай ук федераль башкарма хакимиятнең вузларны гамәлгә куючы вәкаләтләрен башкаручы органнары һәм хәрби уку үзәкләре эшчәнлеген оештыру өлешендә вузлар ректорлары вазыйфалары билгеләнде. Хәрби уку үзәкләренә гражданнарны кабул итү һәм әлеге үзәкләрнең белем бирү эшчәнлеге үзенчәлекләре, уку җыеннары (стажировкалар) үткәрү кагыйдәләре, хәрби уку үзәкләреннән гражданнарны чыгару өчен нигезләр, шулай ук хәрби уку үзәге хезмәткәрләренә таләпләр һәм хәрби уку үзәге эшчәнлеге белән җитәкчелек итү тәртибе билгеләнде.

Гражданнарны хәрби уку үзәгендә укыту турында шартнамә рәвеше китерелгән. Шулай ук федераль дәүләт вузлары каршындагы хәрби укыту факультетлары (хәрби кафедралар) эшчәнлеген регламентлаучы Нигезләмә расланды. Хәрби укыту факультетларында (хәрби кафедраларда) студентлар запастагы офицерларны хәрби әзерләү программасын өйрәнәләр. Хәрби кафедрада укучы гражданнарга ай саен өстәмә стипендия түләнә.

Моннан тыш, дәүләт медицина вузларында хәрби һәм экстремаль медицина кафедраларын төзүне, тиешле кафедраларда көндез уку бүлекләре студентларын медицина профилендәге запастагы офицерларны әзерләү һәм медицина профилендәге запастагы офицерларны яңадан әзерләү программалары буенча укытуны күздә тоткан актлар көчен югалтканнар дип танылды.

Моннан тыш, югары һөнәри белемнең дәүләт, муниципаль яки әзерлекнең (белгечлекнең) тиешле юнәлешләре буенча дәүләт аккредитациясе булган дәүләтнеке булмаган мәгариф учреждениеләрендә хәрби кафедралар турында Нигезләмә һәм күрсәтелгән хәрби кафедраларда РФ гражданнарын запастагы офицерларны әзерләү программалары буенча укыту турында Нигезләмә көчләрен югалталар.

  

“Гарант” компаниясе материаллары буенча