Татарстан Республикасы юстиция министры Рөстәм Заһидуллин “Теләкләр чыршысы” акциясендә катнашты

2024 елның 23 декабре, дүшәмбе

Яңа ел алдыннан Татарстан Республикасы юстиция министры Рөстәм Заһидуллин 2018 елдан башлап ел саен үткәрелә торган “Теләкләр чыршысы” федераль ирекле акциясендә катнашты. Акция каты авырулары булган балаларга, ятимнәргә, аз керемле гаиләләрдә тәрбияләнүче балаларга, шулай ук хәрби хезмәткәрләрнең балаларына ярдәм итүгә юнәлдерелгән.

Быел министрга Алабуга районыннан булган, цифрлы пианино турында хыялланучы дүрт яшьлек Гадел исеменнән язылган Яңа ел открыткасы эләкте. Министр малайга хыялын тормышка ашырырга вәгъдә итте һәм аны якынлашып килүче Яңа ел белән котлады! 

“Теләкләр чыршысы” балаларны сөендерүен һәм аларга иң зур теләкләрен тормышка ашыруга өмет бирүен дәвам итә. Проект сайтына Татарстан Республикасыннан быел 2123 теләк кергән.