Татарстан Юстиция министрлыгы хезмәткәрләре “Кросс нации” традицион йөгерешендә катнаштылар
Узган ялларда Казанда 2004 елдан бирле үткәрелеп килә торган “Кросс нации – 2025” Бөтенроссия йөгерү көне узды. Чара “УРАМ” экстрим-паркында һәм “Локомотив” стадионында узды, анда йөгерергә яратучы меңләгән кеше җыелды.
Татарстан Республикасы Юстиция министрлыгы хезмәткәрләре, гадәттәгечә, спорт чарасында актив катнаштылар. Оештыручылар төрле дистанцияләргә: 1, 2, 4, 6, 8 чакрымга йөгерүне күздә тотканнар. Моннан тыш, махсус форматлар: гаилә йөгереше, пенсионерлар өчен йөгерү һәм “Игелекле Казан” хәйрия старты оештырылды. “Без ел саен әлеге чарада рәхәтләнеп катнашабыз. Программаның шундый күптөрле булуы шәп булды - һәркем көченнән килгән дистанцияне сайлый алды”, - дип сөйләделәр Министрлыкта. Җанатарлар өчен иҗат һәм спорт коллективлары чыгышлары белән концерт-күңел ачу программасы эшләде.
Оештыручылардан алынган мәгълүматлар буенча, быел “Кросс нации” рекордлы сандагы катнашучыларны җыйган, анда 16 170 кеше катнашкан.