ТР юстиция министры: “Имзалар алдыннан документларны укыгыз. Эчтәлекне өйрәнмичә кул куймагыз”
Татарстан Республикасы Хөкүмәте бергәлегендә Төбәк белән идарә итү үзәге ярдәмендә узган туры эфир барышында Татарстан Республикасы юстиция министры Рөстәм Заһидуллин гражданнарга документларны имзалау алдыннан игътибар белән өйрәнүнең мөһимлеген искәртте.
“Кызганыч, документларны игътибар белән карап чыкмау тормышта катлаулы хәлләргә китерә”, - дип ассызыклады министр.
Эфир кысаларында Рөстәм Заһидуллин искәрткәнчә, Юстиция министрлыгы республика территориясендә түләүсез юридик ярдәм оештыру буенча вәкаләтле орган итеп билгеләнгән. Ел башыннан бирле Татарстанның дәүләт юридик бюросына мондый ярдәм сорап 2686 граждан мөрәҗәгать иткән.
“Мөрәҗәгатьләрнең тематикасы түләүсез юридик ярдәм күрсәтелә торган мәйданчыкка бәйле”, - диде министр.
Аның сүзләренә караганда, Дәүләт юридик бюросының Татарстан Республикасында Бала хокуклары буенча вәкаләтле вәкил белән уртак кабул итүләрендә гражданнар еш кына балалар белән бәйле мәсьәләләрне күтәрә: балалар мөлкәтен яклау, аерылышканнан соң бала белән аралашу турындагы бәхәсләр, алимент түләтү һәм ата-ана хокукларыннан мәхрүм итү.
“Дәүләт юридик бюросы һәм Татарстан Республикасында Кеше хокуклары буенча вәкаләтле вәкилнең уртак кабул итүләре вакытында күп балалы ата-аналар һәм аз керемле гражданнар ешрак мөрәҗәгать итә. Монда тематика башка – торак бәхәсләре, пенсия билгеләү, сәламәтлек торышы мәсьәләләре”, - дип аңлатты министр.
Ахырда Рөстәм Заһидуллин көндәлек тормышта киң таралган юридик проблемаларны булдырмау буенча мөһим киңәшләрен бирде.