Рөстәм Заһидуллин Татарстан Республикасы Югары Суды Рәисе урынбасары Эдуард Станиславович Каминскийга “Ел юристы” премиясен тапшырды
Шершеневич исемендәге Бөтенроссия юридик премиясен тапшыру тантанасы булды. “Ел юристы” премиясе ел саен Юристлар көнен бәйрәм итү кысаларында бирелә һәм хокук белгечләренең җәмгыять һәм дәүләт алдындагы казанышларын тану булып тора.
Татарстан Республикасы юстиция министры Рөстәм Заһидуллин Татарстан Республикасы Югары Суды Рәисе урынбасары Эдуард Станиславович Каминскийга “Гадел хөкем” номинациясендә “Ел юристы” премиясен тапшырды.
“Бүген иҗтимагый мөнәсәбәтләрнең бер генә өлкәсе дә юридик ярдәмнән башка узмый, проектларны гамәлгә ашыру һәм халыкның тормыш дәрәҗәсе һичшиксез аның сыйфатына бәйле”, - дип ассызыклады Рөстәм Заһидуллин үзенең сәламләү чыгышында.
Министр юриспруденциянең законлылыкны һәм хокук тәртибен ныгытуда, республиканың социаль-хокукый тормышын яхшыртуда кирәклеген һәм әһәмиятен аерым билгеләп үтте. Аның сүзләренчә, Татарстан юридик җәмәгатьчелегенең эше гражданнарның конституциячел хокукларын тәэмин итү һәм республиканың тотрыклы үсеше өчен ышанычлы нигез булып тора.
Тантананы тәмамлап, Рөстәм Заһидуллин юридик һөнәр вәкилләрен бәйрәмнәре белән котлады һәм хезмәттәшләренә нык сәламәтлек, иминлек һәм һөнәри өлкәдә яңа уңышлар теләде.
Моннан тыш, Татарстан Республикасы Дәүләт юридик бюросы җитәкчесе Марс Расыйх улы Фаткуллин “Түләүсез юридик ярдәм күрсәтү” номинациясендә Татарстан Республикасының “Ел юристы” юридик премиясе лауреаты булды. Бүләкне аңа Россия Юристлар ассоциациясенең Татарстан төбәк бүлеге рәисе Илдар Халиков тапшырды һәм лауреатның социаль якланмаган категориягә керүче гражданнар өчен гадел хөкем алу мөмкинлеген тәэмин итүдә аерым социаль әһәмияткә ия булуын билгеләп үтте.