Коррупциягә каршы көрәш көне алдыннан Татарстан Юстиция министрлыгы хезмәткәрләре креатив флешмоб уздырды
Ел саен 9 декабрьдә билгеләп үтелә торган Халыкара коррупциягә каршы көрәш көне алдыннан Татарстан Республикасы Юстиция министрлыгы “Юстиция министрлыгы коррупциягә каршы” дип аталган масштаблы флешмоб оештырды.
Министрлык хезмәткәрләре акциядә актив катнашып, коррупциягә каршы лозунглар белән фотосурәтләр сериясен булдырдылар. Фотоларда Татарстан Юстиция министрлыгы вәкилләре “Без коррупциягә каршы”, “Намуслылык миннән башлана”, “Законлы юлны сайлыйм” дигән мөһим иҗтимагый чакырулар язылган плакатлар тотып торалар.
“Коррупциягә каршы көрәш – һөнәри эшчәнлегебезнең бер өлеше генә түгел, ул һәр дәүләт хезмәткәренең әхлакый императивы. Әлеге акция белән без һәр хезмәткәрнең коррупциягә каршы культура формалаштыруга шәхсән катнашуын күрсәтергә телибез”, - диделәр республика Юстиция министрлыгында.
Флешмобның үзенчәлеге катнашучыларның лозунгларны формалаштыруга иҗади якын килүе булды. Тәкъдим ителгән вариантлардан тыш, күп кенә хезмәткәрләр үзләренең һөнәри һәм гражданлык позициясен чагылдыра торган үз оригиналь слоганнарын эшләгәннәр.
Флешмоб коррупциягә каршы көрәш буенча республика мәгълүмати кампаниясенең бер өлеше булды.