“Татарстан Республикасының Гаилә Кодексы” турында

2009 елның 13 гыйнварында Татарстан Республикасы Президенты М.Ш.Шәймиев Татарстан Республикасы Дәүләт Советы тарафыннан 2008 елның 15 декабрендә кабул ителгән 4-ТРЗ номерлы “Татарстан Республикасының Гаилә Кодексы”на кул куйды.

Документ белән федераль закон тарафыннан Россия Федерациясе субъектлары вәкаләтләренә бирелгән гаилә мөнәсәбәтләре, шул исәптән уналты яшь тулганчы өйләнешү тәртибе һәм шартлары, ирнең яки хатынның фамилиясен сайлау, балага исем кушу үзенчәлекләре, опекунга (попечительгә) баланы тәрбияләгән өчен акча түләү тәртибе һәм күләме, тәрбиягә алучы ата-аналарга түләнергә тиешле акча күләме, тәрбиягә алучы гаилә турындагы килешүнең эчтәлеге һәм өйләнешү-гаилә мөнәсәбәтләре белән бәйле башка мәсьәләләр җайга салына.

Закон рәсми басылып чыккан көненнән соң 10 көн узгач көченә керә.

Әлеге документ 16.01.2009 елдагы “Республика Татарстан” газетасының 8 номерында һәм 17.01.2009 елдагы “Ватаным Татарстан” газетасының 8 санында дөнья күрде.

 

“КонсультантПлюс” компаниясе материаллары буенча