Юстиция министрлыгы җитәкчеләренең Җиңү көне уңаеннан тантаналарда катнашуы

9 майда республика шәһәрләре һәм районнарында совет халкы Бөек Ватан сугышында Җиңүенең 62 еллыгына багышланган бәйрәм чаралары үтте. ТР Хөкүмәте әгъзаларының традицион рәвештә республика районнарына бәйрәм уңаеннан узган тантаналарга чыгуларында ТР юстиция министры М.М.Корманов һәм аның урынбасарлары катнашты.

Мидхәт Мәзгутович Җиңү көне белән Чүпрәле районы сугыш ветераннарын, тыл хезмәтчәннәрен һәм районда яшәүчеләрне котлады.

Юстиция министрының беренче урынбасары С.Н.Столяров Минзәлә районында мәктәпләр һәм һөнәр училищелары укучылары парадында, шулай ук районда яшәүчеләрнең тантаналы чараларында катнашты. Юстиция министры урынбасары Ә.Б.Сираҗетдинов Яңа Чишмә районы халкы бәйрәмендә булды. Юстиция министрлыгының эшләр идарәчесе С.А.Брусов әфганчы сугышчылар белән бергә Әлмәт шәһәре халкы демонстрациясендә катнашты һәм Әлмәттәге Мәңгелек утка чәчәкләр салды.

ТР Юстиция министрлыгы җитәкчеләре ТР Президенты, ТР Дәүләт Советы, республика Хөкүмәте һәм шәхсән үз исемнәреннән сугыш ветераннарын, тыл хезмәтчәннәрен Җиңү көне белән җылы котладылар һәм алар белән бергә һәлак булган сугышчылар һәйкәлләренә веноклар, чәчәкләр салдылар.

Республика шәһәрләре һәм районнарында бу бөек бәйрәмгә багышланган парадлар, демонстрацияләр, спорт ярышлары, сугыш турында музыкаль-театральләштерелгән кичәләр, бәйрәм концертлары үтте. Тамашаларда өлкәннәр белән бергә балалар эстрада һәм сәнгать коллективлары, вокалист- башкаручылар катнашты.

Тантаналы чаралар җылы аралашу белән үрелеп барды. Үзләренең Җиңү көннәре хакында ветераннар алар хөрмәтенә корылган бәйрәм табыннары артында искә төшерде. Алар өчен Җиңү көне – күзләрне яшьләндерә торган бәйрәм генә түгел, ә аеруча горурлык та. Бу көнне алар тагын сугышчан хатирәләр белән бүлеште, дусларын-иптәшләрен искә алды, сугыш еллары җырларын башкарды.