«Яңа гасырда» «түгәрәк өстәл»

“Яңа гасыр” телеканалында үтә торган “Әйбәт гайбәт” тапшыруының чираттагысы республика халкының хокукый культурасын күтәрү мәсьәләләренә багышланган иде. Анда ТР юстиция министры М.М.Корманов, Суд приставлары федераль хезмәтенең ТР буенча идарәсе җитәкчесе Хәмит Шәрипов, ТР Прокуроры урынбасары Фәрит Заһидуллин һәм Татарстанның кайбер газета-журналлары җитәкчеләре катнашты.

“Үсешенең бүгенге этабында җәмгыять төгәл хокукый системадан башка яши һәм эшли алмый, - диде Мидхәт Мәзгутович. – Бу юнәлештәге адымнарны республика бөтен ил буенча үтә торган үзгәртеп кору кысаларында ясый. Закон иҗат итү эшчәнлеге белән бергә безне гражданнарны хокукый агарту мәсьәләләре дә нык борчый. Махсус брошюралар чыгару буенча эшчәнлегебез, “Хокук һәм хәят” иҗтимагый хокукый журналын бастырып чыгаруыбыз, кирәк булган очракларда башка басма органнарда юридик консультацияләр бастыруыбыз гына җитәрлек түгел. 2010 елга кадәр халыкның хокукый культурасын үстерү буенча республика программасын кабул итү белән минем уйлавымча эшләр күпкә яхшырыр...”.

Журналистларны ришвәтчелекнең тирәнтен сәбәпләре, суд карарларының үз вакытында үтәлмәүләре, гражданнар хокукларын һәм ирекләрен яклау өлкәсендә даими туып торучы проблемалар кызыксындырды. Фикер алышулар кысасында ТР Юстиция министрлыгы журналының баш мөхәррире Хәлим Гайнуллин, мәсәлән, редколлегиянең “Россия Федерациясе гражданнары мөрәҗәгатьләрен карап тикшерү турында” яңа Федераль законны гамәлгә ашыру буенча эш тәҗрибәсе белән уртаклашты, “Хокук һәм хәят” журналының 95-еллыгына әзерлекнең барышы турында сөйләде. “Азатлык” радиосының Казан бюросы директоры Римзил Вәлиев, танылган юрист-адвокат Зөбәйдә Яхина һәм башкалар аерым халыкларның, аларның телләре һәм мәдәниятләренең конституциячел хокукларын яклау мәсьәләләрен күтәрделәр. Бу теманы “Яңа гасыр” ТРКсенең башка тапшыруларында дәвам итәргә карар кылынды.