ТР юстиция министры М.М.Корманов Кремльдә РФ Конституция Суды Рәисе В.Д.Зорькин белән очрашуда

Татарстан Республикасы юстиция министры М.М.Корманов Татарстан Республикасы Президенты М.Ш.Шәймиевнең РФ Конституция Суды Рәисе В.Д.Зорькин белән очрашуында катнашты, ул Казан Кремлендә Татарстан Республикасы Президенты Резиденциясендә үтте.

Искә төшереп үтәбез, Россия Конституция Суды Рәисе Татарстан башкаласына “Россия Федерациясендә конституциячел хөкем практикасында европа стандартлары” дигән темага РФ субъектларының конституция (уставлы) судлары рәисләренең консультатив советы утырышында катнашу өчен килде.

Очрашу тәмамланганнан соң узган журналистлар белән әңгәмәдә ТР Президенты билгеләп үткәнчә, Казанда консультатив очрашулар узу факты билгеле бер ышаныч турында сөйли һәм республиканың дәүләт органнары һәм ТР Конституция суды эшен характерлый.

Татарстан Россиядә беренчеләрдән булып Конституция судын төзеде, диде Минтимер Шәрипович. Судка физик һәм юридик затлардан шактый күп мөрәҗәгать килә һәм халыкның хокукый аңы үсү барышында эш кимеми. Моннан тыш, Россия Федерациясе Конституциясендә каралган дәүләт хакимияте органнары арасында вәкаләтләрне соңгы чикләүләр белән бәйле мәсьәләләр дә бар.

“Без беренче тапкыр хокукый дәүләттә яши башлыйбыз, шуңа күрә хокук беренчел булырга, законнар үтәлергә тиеш”, - дип ассызыклады Татарстан Президенты.

Журналистлар белән әңгәмәдә В.Д.Зорькин Федерациянең барлык субъектларында да Конституция судын төзү кирәклеге турында фикер әйтте.

Искә төшереп үтәбез, Идел буе федераль округында РФ субъектларының өч Конституция суды бар. Россиядә алар барлыгы 16.

Татарстан Республикасы Президентының РФ Конституция Суды Рәисе В.Д.Зорькин белән очрашуында шулай ук РФ Конституция Суды судьясы Б.С.Эбзеев, РФ Конституция Судында Россия Федерациясе Президентының тулы вәкаләтле вәкиле М.В.Кротов, ТР Дәүләт Советы Рәисе Ф.Х.Мөхәммәтшин, ТР Конституция суды рәисе В.Н.Демидов, ТР Президенты Аппараты җитәкчесе Ю.З.Камалтынов, ТР Президентының Дәүләт хокук идарәсе җитәкчесе Р.Ә.Сәхиева һәм башка рәсми затлар катнашты.