ТР юстиция министры М.М.Корманов «Татарстан» ДТРКнең туры эфирында

Бүген ТР юстиция министры М.М.Корманов «Татарстан» дәүләт телерадиокомпаниясенең радио тыңлаучылары белән туры эфирда очрашты. Сүз хәзерге вакытта Татарстан Республикасы Юстиция министрлыгының бурычлары һәм функцияләре турында барды.

Тыңлаучыларны җәмәгать юстициясе, дәүләт нотариаты, закон проектлары белән эшчәнлек өлкәсендә Министрлыкның эшен оештыру белән бәйле, Татарстан Республикасы норматив хокукый актларының бердәм банкы бүлеге мәсьәләләре, җирле үзидарә органнары белән багланышлар, шулай ук эшчәнлекнең яңа юнәлешләре кызыксындырды.

Тыңлаучыларның күпсанлы сорауларына җавап биреп, юстиция министры Татарстан Республикасы Президентының Татарстан Республикасы Дәүләт Советына Юлламасында, Россия Президентының Россия Федерациясе Федераль Җыенына Юлламасында билгеләнгән стратегик юнәлешләрне гамәлгә ашыруда Министрлыкның катнашуы турында сөйләде. Аларга өстенлекле илкүләм проектларны хокукый тәэмин итү, Татарстан Республикасының коррупциягә каршы сәясәтен гамәлгә ашыру, республика территориясендә уен йортлары эшчәнлеген тәртипкә китерү, җирле үзидарә үсешендә хокукый ярдәм, күчемсез мөлкәткә хокукларны һәм алар белән килешүләр төзүне дәүәт теркәвенә алу өчен документларны рәсмиләштерүнең универсаль регламентларын кертү керә.

Мидхат Мәзгутович тыңлаучыларга узган ел министрлык структурасында оешкан Хокукый мәсьәләләр буенча җирле үзидарә органнары белән багланышлар оештыру департаментының эше турында; Министрлыкның, аерым алганда эшчәнлекләренә хокукый ярдәм күрсәтү мәсьәләләрендә җирле үзидарә органнары белән багланышлар оештыру, муниципаль районнарның һәм шәһәр округларының җирле үзидарә органнары тарафыннан административ комиссияләрнең, балигъ булмаганнарның эшләре һәм аларның хокукларын яклау комиссияләрен төзү һәм эшчәнлекләре буенча дәүләт вәкаләтләре үтәлүне контрольдә тоту функцияләрен киңәйтү турында; Хокукый мәсьәләләр буенча ведомствоара координацияләү комитеты эше турында мәгълүмат бирде.

Үз чыгышында министр ТР Юстиция министрлыгында 2002 елдан бирле чыгып килүче һәм Интернет челтәрендә урнаштырылган “Хокук һәм хәят” иҗтимагый-хокукый һәм фәнни журналы турында, шулай ук Интернет челтәрендә урнаштырылган Татарстан Республикасы Норматив хокукый актларының бердәм банкының Интернет-версиясе турында искә алды.

Юстиция министры М.М.Корманов белән туры эфирны тыңлаучылар һәм катнашучылар Татарстан Республикасы Юстиция министрлыгының заманча роле һәм бурычлары турында үзләренә яңа күзаллау булдырдылар.