АКШ Юстиция министрлыгы вәкиле белән Татарстан Юстиция министрлыгында очрашу

Бүген ТР Юстиция министрлыгында Татарстан Республикасы юстиция министры урынбасары – Хокукый мәсьәләләр буенча җирле үзидарә органнары белән багланышлар оештыру департаменты җитәкчесе А.А.Ощепков Америка Вәкиллеге вәкиле - АКШ Юстиция министрлыгының хокукый мәсьәләләр буенча даими вәкиле Терри Кини белән очрашты. Кунак белән очрашуда шулай ук Татарстан Республикасында кеше хокуклары буенча вәкаләтле вәкил Р.Г.Вәгыйзов катнашты.

Очрашу барышында АКШ Юстиция министрлыгының Россия белән, шул исәптән Татарстан Республикасының хокук саклау органнары белән хезмәттәшлеге перспективалары турында фикер алышынды. Терри Кини Татарстанга коррупция һәм коррупционерлар белән көрәшү, акчаны читкә җибәрү, ришвәтчелек, судьяларны һәм шаһитләрне яклау, кешеләр белән сәүдә итү һәм башка гомуммилли мәсьәләләр буенча халыкара конференция оештыру максаты белән килде. АКШ Вәкиллеге фикеренчә, Россия һәм Американың хезмәттәшлек өчен уртак мәсьәләләре күп һәм вәкиллек аларның теләсә кайсында да файдалы булырга әзер. Казанда АКШ Юстиция министрлыгы катнашында халыкара конференция үткәрүнең якынча вакыты быелның декабрь башында дип планлаштырыла.

Терри Кини әфәнде очрашуда катнашучыларга АКШ Юстиция министрлыгы эшен оештыру турында, хакимият органнары структурасы турында сөйләде, АКШ Юстиция министрлыгында шулай ук аналитик һәм закон проектлары белән шөгыльләнүче бүлек барлыгын ассызыклады. Кунакны кызыксындырган сораулар даирәсе бик киң иде: федераль хакимият һәм субъектлар арасында вәкаләтләр бүлешү, судьяларның һәм аларның гаилә әгъзаларының иминлеге, Юстиция министрлыгы аппаратының санлы составы, җәмәгать судьяларын финанслау һәм башка мәсьәләләр.

Америка Вәкиллеге вәкиле ТР Югары суды, ТР Прокуратурасы җитәкчелеге, Татарстан Республикасында кеше хокуклары буенча вәкаләтле вәкил белән очрашты, Юстиция министрлыгыннан тыш ул шулай ук коррупциягә каршы сәясәтне гамәлгә ашыру вәкаләтләре йөкләнгән кешеләр белән, Казан дәүләт университеты ректоры, республиканың хокук саклау органнары белән очрашырга җыена.