ТР Дәүләт Советы журналистлар күзлегеннән

ТР Дәүләт Советының кече залында “Яңа тарих. ТР Дәүләт Советы журналистлар күзлегеннән” дигән яңа гына табадан төшкән китапны тәкъдир итү булды. Гаять үзенчәлекле бу китапның авторлары – республика газеталарының һәм журналларының баш мөхәррирләре, парламент корреспондентлары һәм депутатлар үзләре. Алар арасында ТР Юстиция министрлыгының “Хокук һәм хәят” журналының баш мөхәррире Хәлим Гайнуллин, “Республика Татарстан” газетасы баш мөхәррире Александр Латышев, ТР Дәүләт Советы матбугат үзәге җитәкчесе (1995-2003 еллар) Любовь Агеева һәм башка бик күпләр бар. Очрашудан файдаланып, алар парламентның төрле елларда кайнаган эшчәнлеге турында фикерләре белән бүлештеләр.

Аудитория алдында чыгыш ясап, ТР Дәүләт Советы Рәисе Фәрит Мөхәммәтшин мәкаләләр авторларына, парламент бәйләменә зур күләмле хезмәтләре өчен чын күңелдән рәхмәтен белдерде һәм тарих өчен кирәкле бу хезмәтне дәвам иттерергә кирәк дигән тәкъдим ясады. “Үз язмаларын әзерләгәндә журналистлар туктап тору, әйләнеп карау, бүгенге үзләрен дә, һәм Татарстан парламентын да әле күптән түгел яшәгән күзаллаулар белән чагыштырып карау мөмкинлегенә ия булдылар, - диде ул. - Әмма иң мөһиме, алар Татарстан халкы үзе формалаштырган безнең демократик органга хөрмәт белән карадылар”.

Тәкъдир итүдә басманың башлап йөрүчесе - ТР Дәүләт Советы Рәисе урынбасары, безнең республиканың Журналистлар берлеге рәисе Римма Ратникова да чыгыш ясады.

- Хакимият белән матбугат арасындагы мөнәсәбәтләр – демократик җәмгыятьнең иң очлы почмаклы мәсьәләсе, - диде ул. – Татарстанда бу мөнәсәбәтләр нинди соң? Бу китапта, штрихлар белән генә булса да, республиканың закон чыгару хакимиятенең иң яхшы яклары чагылган, алар - иң беренче чиратта матбугат өчен мөһим сүз иреге, фикерне ачык белдерә алу һәм парламент эшчәнлегенә шактый тәнкыйди караш. Китапта журналистларның сәләте һәм депутатларның җитдилеге берләшкән.