Автономияле учреждениеләр төзү мәсьәләсе буенча киңәшмә

2007 елның 27 июлендә ТР Юстиция министрлыгында мәгариф кластерлары өлкәсендә автономияле учреждениеләр төзү мәсьәләсе буенча киңәшмә булды. Билгеле булганча, “Автономияле учреждениеләр турында” 2006 елның ноябрендә кабул ителгән Федераль закон нигезендә хәзерге вакытта гамәлдә булган дәүләт бюджет учреждениеләре белән чагыштырганда күбрәк мөстәкыйльлеккә ия мондый учреждениеләр фән, мәгариф, сәламәтлек саклау, мәдәният, социаль яклау, халыкның эш белән тәэмин ителеше, физик культура һәм спорт өлкәләрендә төзелә ала.

Безнең республикада автономияле учреждениеләрне төзү процессы актив бара, бу аларны финанслауны яхшыртырга мөмкинлек бирәчәк, һәм нәтиҗә буларак әлеге учреждениеләр тарафыннан халыкка күрсәтелә торган хезмәтләрнең сыйфатын арттырачак һәм исемлеген киңәйтәчәк.

Юстиция министрлыгы, Мәгариф һәм фән министрлыгы, Сәламәтлек саклау министрлыгы, Хезмәт, эш белән тәэмин итү һәм социаль яклау министрлыгы җитәкчеләре һәм белгечләре катнашкан киңәшмәдә урта профессииональ белем, социаль яклау һәм сәламәтлек саклау системасында конкрет автономияле учреждениеләр төзүгә кагылышлы Татарстан Республикасы Министрлар Кабинеты каралары проектларын килештерү мәсьәләләре карап тикшерелде. Әлеге учреждениеләр инде якын киләчәктә үзләренең эшчәнлекләрен башларга тиеш. Закон проектлары белән эшләү бүлеге җитәкчесе Ә.Р.Кәримова һәм бүлек җитәкчесе урынбасары Л.И.Ибраһимова караларның проектларын федераль законнардагы соңгы үзгәрешләргә туры китерү зарурлыгына тукталдылар.

Киңәшмәне юстиция министрының беренче урынбасары С.Н.Столяров алып барды.