Ипотека һәркемгә дә ачык

2007 еның 2 августында Татарстан Республикасы Министрлар Кабинеты “Татарстан Республикасында торак төзелешен үстерүгә дәүләт ярдәме турында” 2004 елның 27 декабрендәге 69-ТРЗ номерлы Татарстан Республикасы Законын гамәлгә ашыру буенча алга таба чаралар һәм республика дәүләт ярдәме кысаларында торак бирү тәртибен камилләштерү турында” 336 номерлы карар кабул итте.

Бүген Татарстан Республикасы Министрлар Кабинетында узган брифинг әлеге карарның төп нигезләмәләрен аңлатуга багышланган иде. Анда Татарстан Республикасы Президенты каршында Дәүләт торак фондының башкарма директоры Т.М.Абдуллин һәм Татарстан Республикасы юстиция министрының беренче урынбасары С.Н.Столяров катнашты.

Брифинг видеоконференция режимында үткәрелде, ул республиканың барлык муниципаль районнарын да колачлады. Анда шулай ук массакүләм мәгълүмат чаралары да чакырылган иде.

Брифингта катнашучылар гражданнарга социаль ипотека буенча торак урыннары бирелү тәртибен, социаль ипотека буенча гражданнарның түләү шартларын билгеләү һәм вакытын кичектереп тору тәртибен аңлатып күрсәттеләр, журналистларның күпсанлы сорауларына җавап бирделәр. Массакүләм мәгълүмат чаралары вәкилләрендә социаль ипотека буенча кичектереп түләүләрнең вакытын озайту, шулай ук торак урыннарын биргәндә халыкның кайбер категорияләренә социаль яклау чаралары көчәйтелү белән бәйле сораулар зур кызыксыну уятты. С.Н.Столяров билгеләп үткәнчә, республика законнарына кертелгән үзгәрешләр социаль ипотека программасында катнашучы барлык органнар карарларының ачык һәм аңлаешлы булуын тәэмин итәчәк.

Үткәрелгән брифинг һәм анда күтәрелгән мәсьәләләр турында мәгълүмат республика һәм район газеталарында урнаштырылачак, шулай ук радио-телевидение программаларында яктыртылачак.