Казан шәһәре чикләрен киңәйтү турында Министрлар Кабинеты инициативасын шәһәр Думасы хуплады

Казан шәһәре инфраструктурасын камилләштерү, республика башкаласының киләчәктә икътисадый үсеше өчен шартлар тудыру зарурлыгы шәһәр чикләрен киңәйтүне таләп итә. Бу максатларда Татарстан Республикасы Министрлар Кабинеты Казан шәһәре, шулай ук шәһәргә терәлеп торучы һәм Биектау, Лаеш, Питрәч муниципаль районнары составына керүче кайбер муниципаль берәмлекләрнең чикләрен үзгәртү инициативасы белән чыкты. Бу мәсьәлә буенча 2007 елның 29 сентябрендә Татарстан Республикасы Хөкүмәтенең 527 номеры карары дөнья күрде.

“Россия Федерациясендә җирле үзидарә оештыруның гомуми принциплары турында” Федераль закон нигезендә бу инициатива турында территорияләре үзгәртелергә тиешле муниципаль районнар җирле үзидарәләренең вәкиллекле органнарында фикер алышынырга тиеш. Быелның 3-4 октябрьләрендә Биектау, Лаеш, Питрәч муниципаль районнары Советлары Хөкүмәт инициативасын карап тикшерделәр һәм хупладылар.

Бүген Казан шәһәре Думасы утырышында шулай ук әлеге мәсьәлә карап тикшерелде. Аның буенча доклад белән Татарстан Республикасы юстиция министры М.М.Корманов чыгыш ясады. Үз чыгышында Мидхәт Мәзгутович тиешле карар кабул итүнең нигезлеген дәлилләде, муниципаль берәмлекләрнең чикләрен үзгәртүнең барлык хокукый аспектлары җентекләп эшләнүен билгеләп үтте һәм депутатларны Министрлар Кабинеты инициативасын хупларга чакырды.

Бу мәсьәләне карап тикшерү нәтиҗәләре буенча Казан шәһәре Думасы Хөкүмәт инициативасын яклап чыгарга һәм муниципаль берәмлекләрне үзгәртеп төзү һәм шәһәрнең чикләрне үзгәртү мәсьәлә буенча Казан шәһәренең барлык территориясендә тавыш бирүне 2007 елның 2 декабренә билгеләргә дигән карарга килде. Бу вакытка кадәр әлеге тема буенча халык тыңлаулары үткәреләчәк, алар 25 октябрьгә билгеләнгәннәр. Шулай итеп, карап тикшерелә торган мәсьәлә буенча соңгы сүзне, җирле үзидарә турында законнар нигезендә, Казан шәһәре халкы әйтәчәк.