РФ Генераль прокуроры сайлау кампаниясен шәхси контроленә ала

Яңа чакырылыштагы Дәүләт Думасы депутатларын сайлау кампаниясен үткәрү вакытында законлылыкны тәэмин итү максатыннан Генераль прокурор Ю.Я. Чайка “РФ Федераль Җыены Дәүләт Думасы депутатларын сайлау турында законнарның үтәлешен прокурор күзәтчелегенә алуны оештыру турында” Күрсәтмәгә кул куйды.

Моның белән бәйле Россия Федерациясе субъектлары прокурорларына сайлаулар турында законнар өлкәсендә хокук бозуларны үз вакытында чикләү өчен хокук саклау органнары һәм дәүләт хакимияте органнары вәкилләре катнашында эшче төркемнәр төзергә киңәш ителә. Моннан тыш, эшче төркемнәрнең бурычы булып прокурор тәэсир итүе чараларын куллануны таләп итүче факторлар билгеле булу турында РФ Генераль прокуратурасы җитәкчелегенә оператив мәгълүмат җиткерү торачак.

Сайлау кампаниясен үткәрү вакытында сайлауларның билгеләнгән үткәрелү тәртибен бозучы җинаятьләрне һәм сайлау комиссиясе әгъзалары, теркәлгән кандидатлар, дәүләт хакимияте һәм җирле үзидарә органнары, җәмәгать оешмалары кылган башка җинаятьләрне кисәтүгә аеруча игътибар биреләчәк.

Прокуратура органнарының төп бурычларының берсе – иҗтимагый-сәяси хәлне тотрыксызландыруга юнәлдерелгән экстремистик чыгышлар һәм халыкны чакырулар фактларын табып алу һәм чикләү буенча эш булачак. Моннан тыш, сайлаулар турында законнарны бозу мәсьәләләре буенча шикаятьләргә үз вакытында игътибар итү максатыннан прокурорлар гражданнарны шәхси кабул итүләрне сайлау кампаниясен үткәрү дәверендә көн саен ялларсыз башкарачак.

Бу эшне Генераль прокурор шәхси контроленә алган.