РСэАнең Казан филиалында җәмәгать судьялары аппараты хезмәткәрләре квалификация күтәрү курсларында укуларын тәмамладылар

Бүген Россия суд эшчәнлеге академиясенең Казан филиалында Татарстан Республикасы җәмәгать судьялары аппараты хезмәткәрләре квалификация күтәрү курсларында укуларын тәмамладылар. Уку-укыту программасының йомгаклау баскычы итеп академиядә үзләштерелгән теоретик һәм гамәли материаллар буенча тыңлаучылар белән имтихан әңгәмәсе үткәрелде.

ТР юстиция министры урынбасары Ә.Б.Сираҗетдинов белем алучыларга “Җәмәгать судьялары аппараты эшчәнлегенең принциплары һәм бурычлары” программасы буенча Россия суд эшчәнлеге академиясе филиалында кыска вакытлы квалификация күтәрүне раслаучы таныклыклар тапшырды.

Курсларны ябу һәм таныклыклар тапшыру тантанасы барышында җәмәгать судьялары аппараты хезмәткәрләре белән әңгәмә булды. Министр урынбасары Ә.Б.Сираҗетдинов һәм ТР Юстиция министрлыгының җәмәгать судьялары аппаратын оештыру-методик яктан тәэмин итү бүлеге җитәкчесе К.Е.Мышливец курсларны тыңлаучыларның сорауларына җавап бирделәр һәм республикада җәмәгать судьяларының саны арту белән бәйле җәмәгать судьялары аппаратын кадрлар белән тәэмин итү перспективалары турында сөйләделәр.

Тыңлаучыларны кызыксындырган кайбер сораулар 2 ноябрьдә “Казан” ММҮдә узачак ТР җәмәгать судьялары аппараты администраторлары һәм хезмәткәрләре белән семинар-киңәшмәдә фикер алышу өчен нигез булачак.