Татарстан Республикасы Премьер-министры ТР Иҗтимагый палатасы әгъзалары белән очрашты

Татарстан Республикасы Иҗтимагый палатасы “Татарстан Республикасы Иҗтимагый палатасы турында” 2005 елның 14 октбярендә кабул ителгән Татарстан Республикасы Законы нигезендә оешты, аның максаты – Татарстанның дәүләти, икътисадый һәм социаль үсешенең мөһим мәсьәләләре турында халык белән ачык фикер алышуны тәэмин итү, дәүләт хакимияте органнары һәм җирле үзидарә органнары карарлар кабул иткәндә җәмәгатьчелек фикерен исәпкә алу механизмларын камилләштерү.

Бүген ТР Министрлар Кабинетында ТР Премьер-министры Р.Н.Миңнехановның Татарстан Республикасы Иҗтимагый палатасы әгъзалары белән очрашуы булды. Фикер алышуга чыгарылган мәсьәләләр турында сөйләшүдә ТР юстиция министры М.М.Корманов катнашты. Мәсьәләләрнең берсе – ТКХ ын үзгәртеп коруга ярдәм итү федераль фондыннан һәм республика бюджетыннан финанслана торган торак фондка капиталь ремонт ясау иде.

Премьер-министр программаны финанслау схемасы турында сөйләде: аны гамәлгә ашыру өчен муниципаль берәмлекләр бюджетларыннан чаралар, халык, республика бюджеты чаралары (2008 елга 1 млрд. сум тирәсе каралган) һәм ТКХ ын үзгәртеп коруга ярдәм итү фонды чаралары (2 млрд. сум тирәсе) җәлеп ителәчәк.

Р.Н.Миңнеханов республикада торак фондына капиталь ремонт ясау программасын гамәлгә ашыруны “моңарчы күрелмәгән факт” дип атады һәм бу мәсьәлә буенча муниципаль берәмлекләр администрацияләре һәм ТР Хөкүмәте җитди эш алып барачагын искәртте.

Иҗтимагый палата өчен бу мәсьәләдә эш даирәсе гаять киң. Ул беренче чиратта игътибарны төзелеш һәм бизәлеш материалларын сатып алу системасында оешканлык проблемаларына, намуссыз сатучылар проблемаларына юнәлтергә тәкъдим итте.

ТР Иҗтимагый палатасы вәкилләре ТР Хөкүмәте башлыгы белән фикер алышкан икенче мәсьәлә халыкка дәүләт хезмәтләре күрсәтү иде.

2006-2007 елларда ТР Иҗтимагый палатасы эшчәнлеге турында кыскача белешмә белән Иҗтимагый палата рәисе И.К.Хәйруллин чыгыш ясады. Ул билгеләп үткәнчә, республикада Иҗтимагый палата эше өчен уңай шартлар тудырылган. Хезмәттәшлек өчен аерым рәхмәтне ул ТР Юстиция министрлыгына һәм ТР Финанс министрлыгына белдерде.

Палатаның беренче составы эшләү вакытында аның әгъзалары тарафыннан 40 тан артык Татарстан Республикасы законнары проектлары һәм ТР Министрлар Кабинеты карарлары карап тикшерелгән.

Шул ук вакытта Иҗтимагый палата рәисе ассызыклап үткәнчә, оешма кискен социаль мәсьәләләр буенча керә торган шикаятьләрне мәҗбүри тәртиптә карап тикшерә.

ТР Иҗтимагый палатасы әгъзалары республика Премьер-министры белән ММЧ белән багланышлар мәсьәләләре, яшьләр сәясәте проблемалары, хакимият органнарының ачыклыгын тәэмин итү мәсьәләләре турында фикер алыштылар.

Очрашуга йомгак ясап, Хөкүмәт башлыгы киләчәктә дә Татарстан Иҗтимагый палатасы әгъзалары белән проблемалар турында нигезле фикер алышуга әзер булуын белдерде.