Казан Кремлендә Казанны үстерүнең Генпланы турында фикер алыштылар

Кичә Кремльдә ТР Президенты М.Ш.Шәймиев рәислегендә Казан шәһәренең Генераль планы турында фикер алышу буенча эш киңәшмәсе үтте.

Казанның соңгы генпланы 1969 елда расланган иде һәм бүгенгә көнгә ул тулысынча диярлек тормышка ашырылган. Яңа генпланны эшләү эше 2003 елдан бирле алып барыла. Проект халык тыңлауларын үтте инде. Аны 2007 ел ахырына кадәр расларга уйлыйлар. Соңгы баскыч булып аны Казан шәһәре Думасы сессиясендә ахыргы раслау торачак. Шәһәрне үстерү, республика башкаласының инвестицияләр җәлеп итүен күтәрү максатлары яңа нигезле шәһәр төзелеше документын кабул итүне таләп итә.

Искә төшерәбез, ТР Дәүләт Советының соңгы утырышында беренче укылышта “Татарстан Республикасының аерым муниципаль берәмлекләренең чикләрен яңадан оештыру, үзгәртү һәм кайбер законнарга үзгәрешләр кертү турында” закон проекты хупланды, ул республика башкаласы чикләрен киңәйтү өчен хокукый нигез булдыра.

Чикләрне яңадан оештыру һәм үзгәртүнең төп максаты – Татарстан Республикасы башкаласының һәм гомумән алганда төбәкнең алдагы икътисадый үсеше өчен шартлар тудыру.

Яңадан оештыру һәм үзгәртүнең инициаторы ТР Министрлар Кабинеты. Мондый башлангычны әлеге процесста катнашучы, үз карарлары белән тиешле муниципаль берәмлекләр халкының яңадан оештыруга (чикләрне үзгәртүгә) ризалыгын белдергән барлык муниципаль берәмлекләрнең вәкаләтле органнары яклап чыкты.