Бүген Россия Федерациясе Конституциясе көне

Бүген Россиядә Конституция көне. РИА “Новости” искә төшереп үткәнчә, 14 ел элек (1993) бөтенхалык тавыш бирүе барышында Россия Федерациясе Конституциясе кабул ителгән иде (1994 елдан алып 2004 елга кадәр бу көн дәүләт бәйрәме иде).

Конституция – сәяси, юридик һәм идиологик документ. Конституциянең юридик әһәмияте шунда ки, ул гамәлдәге хокук тәртибенең законнарын үстерүнең юридик нигезе булып тора. Конституция югары юридик көчкә ия булганга күрә, калган башка актлар аңа туры килергә тиеш, бу исә, аерым алганда, конституциячел (шул исәптән, суд) контроль системасы белән тәэмин ителә.

Беренче Конституция 1918 елда РСФСР оешуга бәйле кабул ителгән иде. Икенче Конституция 1923 елның 6 июлендәге беренче чакырылыш СССР ҮЗКның икенче сессиясе тарафыннан һәм соңгы редакциядә 1924 елның 31 гыйнварында СССР Советларының II съезды тарафыннан (СССР төзелү белән бәйле) кабул ителгән иде. Чираттагы СССР Конституциясе – 1936 елгы (“сталинныкы”, 1936 елның 5 декабрендә ССР Союзы Советларының Гадәттән тыш VIII съезды тарафыннан расланган иде). Яңа СССР Конституциясе (“брежневныкы”) 1977 елның 7 октябрендә тугызынчы чакырылыш СССР Югары Советының чираттан тыш җиденче сессиясендә кабул ителгән иде. 1993 елда РФ Президенты Яңа Конституция эшләү өчен Конституция киңәшмәсе чакырган иде. Аның эшендә сәяси партияләр һәм хәрәкәтләр вәкилләре, галимнәр, РФ субъектлары вәкилләре, Россия халык депутатлары һәм башкалар катнашкан. Яңа Конституция кабул итү буенча референдум 1993 елның 12 декабрендә бер үк вакытта Россиянең закон чыгару органына – Федераль Җыенга сайлаулар белән үткәрелгән иде. Референдумда теркәүгә алынган сайлаучыларның 54,8 проценты катнашты, аларның 58,4 проценты Конституция өчен тавыш бирде.