Дәүләт Думасы дини вузларны тәмамлаучыларның дәүләт дипломнары турында төзәтмәләр кабул итте

Дәүләт Думасы җомга көнне узган утырышында өченче укылышта төзәтмәләр кабул итте, алар нигезендә дини югары уку йортлары дәүләт аккредитациясен, ә аларны тәмамлаучылар – дәүләт үрнәгендәге, әмма дәүләт гербы сурәте төшерелмәгән дипломнар алачаклар.

“Мәгариф турында”, “Югары һәм вуздан соңгы югары белем турында” һәм “Намус иреге турында һәм дини берләшмәләр хакында” законнарга кертергә тәкъдим ителгән төзәтмәләр нигезендә дини вузларга учреждениенең дәүләт статусы билгеләнмичә генә дә дәүләт аккредитациясен алу мөмкинлеге биреләчәк (хәзергә исә һөнәри дини белем бирү учреждениеләре дини оешмалар буларак теркәүгә алыналар). Шуңа күрә дипломнарында РФ Гербы рәсеме булмаячак.

Төзәтмәләрдән күренгәнчә, уку йортлары “теология” дәүләт стандарты буенча белем бирүгә күчәргә әзер булырга тиеш, моның өчен аларга өстәмә предметлар кертергә туры киләчәк, аерым алганда, физкультураны.

Дәүләт Думасының Мәгариф комитеты Григорий Балыхин ("Бердәм Россия") ассызыклап үткәнчә, дини белем алучы студентлар, закон проекты кабул ителгәч, армиягә баруны кичектереп тора алачаклар, шулай ук аларга стипендия дә түләнәчәк. “Тиешле чыгымнар 2009-2010 елларга бюджетлар проектларында инде каралган”,- дип билгеләп үтте ул. Депутат сүзләренә караганда, закон проекты кабул ителгән очракта, ул рәсми басылып чыккан көненнән көченә керәчәк.

Мәгариф һәм фән министрлыгы мәгълүматлары буенча, Россиядә 39 дини уку йортының Россия мәгариф күзәтчелеге лицензияләре бар. Әмма хәтта Мәскәү һәм Санкт-Петербург дини академияләре кебек дөньякүләм танылган дини уку йортларын тәмамлаучылар да хәзергә рәсми рәвештә югары белемле дип танылмыйлар.

 

РИА Новости