Апаста күчмә семинар

Кичә Апаста территориаль семинар узды, анда Апас, Буа, Югары Ослан, Чүпрәле, Кайбыч, Кама Тамагы, Тәтеш муниципаль районнары муниципаль берәмлекләренең җирлекләр башлыклары һәм вәкиллекле органнары депутатлары Татарстан Республикасында муниципаль реформаны гамәлгә ашыру проблемалары турында фикер алыштылар.

Семинар дәресләрне ТР Дәүләт Советы оештырды. Аның эшендә ТР Дәүләт Советы Рәисе урынбасары Р.А.Ратникова, ТР муниципаль берәмлекләре Советы рәисе М.З.Шакиров, Апас муниципаль районы башлыгы Р.Н.Заһидуллин, ТР Министрлар Кабинетының дәүләт хакимиятенең башкарма органнары ҖҮИ органнары багланышларын оештыру бүлеге җитәкчесе А.Н.Белов катнаштылар.

Семинарны ТР Дәүләт Советы Рәисе урынбасары Р.А.Ратникова ачты. Ул билгеләп үткәнчә, республика парламенты, ТР Министрлар Кабинеты һәм ТР муниципаль берәмлекләре Советы тарафыннан махсус семинарлар, муниципаль кадрларны хокукый әзерләү максатыннан, җирле үзидарә вәкилләренә законнардагы соңгы үзгәрешләр турында мәгълүмат бирү өчен үткәрелде.

Парламент башлыгы урынбасары сүзләренә караганда, әлеге территориаль семинарның бурычы - РФ Президенты каршында яңа төзелгән җирле үзидарәне үстерү Советы карарлары белән җирле үзидарә вәкилләрен таныштыру, шулай ук муниципаль хезмәтләргә, муниципалитетларның үз керемнәре белән тәэмин ителеше, җирле салымнарның җыелу дәрәҗәсенә кагылышлы мәсьәләләр турында фикер алышу.

Муниципаль берәмлекләрнең Бөтенроссия конгрессы эше нәтиҗәләре турында ТР муниципаль берәмлекләре Советы рәисе М.З.Шакиров җиткерде.

Семинарда җирле үзидарә турында федераль һәм республика законнары үсеше, аерым алганда, җирлекләрнең җирле администрация башлыклары тарафыннан  нотариаль гамәлләр кылу тәртибе турында, опека һәм попечительлек буенча тапшырылган вәкаләтләрне тормышка ашыру өлешендә җирле үзидарә органнарының хокуклары һәм бурычлары турында, муниципаль законнардагы үзгәрешләр хакында ТР юстиция министры урынбасары А.А.Ощепков сөйләде. Ул шулай ук март аенда республика районнарында муниципаль хезмәткәрләр өчен уку семинарларының чираттагы этабы башланачагын хәбәр итте.

Семинарда катнашучылар алдында ТР Финанс министрлыгы һәм ТР Җир һәм мөлкәт мөнәсәбәтләре министрлыгы, федераль салым һәм теркәүгә алу хезмәтләре идарәләре вәкилләре чыгыш ясадылар, алар 2006-2007 елларда муниципаль берәмлекләрнең бюджетлары үтәлеше белән бәйле мәсьәләләрне, бюджет турындагы законнардагы үзгәрешләрне, шулай ук җир һәм мөлкәт мөнәсәбәтләрен җайга салу, күчемсез мөлкәткә һәм аның белән алыш-бирешләргә хокукларны теркәүгә алу эше практикасы турында аңлаттылар.

Семинар ахырында оештыручылар җирле үзидарә органнары вәкилләренең яңа тапшырылган вәкаләтләрне җирле үзидарә органнары тарафыннан гамәлгә ашыру үзенчәлекләренә, муниципаль хезмәткәрләрнең хокуклары һәм бурычларына кагылышлы сорауларга җавап бирделәр.