Парламент комитеты ТР җәмәгать судьялары турында мәсьәләне карап тикшерде

Кичә Алексеевск муниципаль районында Татарстан Республикасы Дәүләт Советының Законлылык, регламент һәм дәүләт этикасы комитетының күчмә утырышы булды, анда “Татарстан Республикасы җәмәгать судьялары турында”, “Татарстан Республикасында суд участокларын һәм җәмәгать судьялары вазыйфаларын булдыру турында” ТР Законнарын тормышка ашыру һәм аларның Алексеевск, Әлки, Спас һәм Чистай муниципаль районнарында гамәлдә булулары нәтиҗәлелеге мәсьәләсе карап тикшерелде.

Утырышның көн тәртибендәге пунктларның берсе ТР юстиция министры урынбасары Ә.Б.Сираҗетдиновның югарыда күрсәтелгән законнарны тормышка ашыру буенча ТР Юстиция министрлыгының эш нәтиҗәләре турындагы доклады иде. Аерым алганда, ул Татарстан Республикасында 168 суд участогы төзелү һәм судьялар корпусының оешуы турында хәбәр итте. “Татарстан Республикасында суд участокларын һәм җәмәгать судьялары вазыйфаларын булдыру турында” ТР Законына үзгәрешләр кертелгәннән соң ТР җәмәгать судьялары вазыйфаларының һәм суд участокларының саны 14 берәмлеккә арттырылган. Күрсәтелгән Законны үтәү өчен җәмәгать судьялары саны арттырылган ТРның 5 муниципаль районында суд участокларының чикләрен билгеләү турында ТР Министрлар Кабинеты карарлары кабул ителгән.

Ә.Б.Сираҗетдинов үз докладында ТР Министрлар Кабинеты күрсәтмәсе нигезендә ТР Җир һәм мөлкәт мөнәсәбәтләре министрлыгына, ҖҮИ органнары белән үзара мөнәсәбәттә торып, җәмәгать судьяларының суд участокларын билгеләнгән таләпләргә һәм стандартларга туры китереп урнаштыруны тәэмин итү йөкләнгән булуны ассызыклады.

Бу күрсәтмәне үтәү өчен 61 суд участогы, Интернет челтәренә чыгулары тәэмин ителеп, ТР Телекоммуникацияләр Дәүләт интегрирлашкан системасына һәм электрон почтага тоташтырылган. 6 суд участогы төрле сәбәпләр аркасында бу системага әлегә тоташтырылмаган.

Министр урынбасары үз чыгышында суд эш башкаруын автоматлаштыру өчен программалар белән тәэмин итү турында, җәмәгать судьялары аппаратларының штатлар белән комплектлануы, судьяларга һәм аппарат хезмәткәрләрендә йөкләнешнең тигез булмавы турында мәсьәләләргә дә игътибар итте. Алексеевск, Әлки, Спас һәм Чистай муниципаль районнарында штатлар, җиһаз, оргтехника, компьютерлар белән комплектлану һәм биналар белән тәэмин ителүгә җентекле сыйфатлама тәкъдим ителде.

Мәсьәлә турында фикер алышу буенча ТР Югары судының беренче урынбасары Р.А.Шәрифуллин, ТРда Суд департаменты Идарәсе җитәкчесе урынбасары С.М.Хисамова чыгыш ясадылар.