Татарстан Республикасында интеллектуаль милек көннәре

Бүген Татарстан Республикасы Дәүләт Советында “Татарстан Республикасы икътисадында интеллектуаль милек” дигән фәнни-гамәли конференция булды, ул Халыкара интеллектуаль милек көненә багышланган иде, аны Татарстан Республикасы юстиция министры М.М.Корманов үткәрде.

Бөтендөнья интеллектуаль милек оешмасының Генераль ассамблеясе 2000 елда 26 апрельне Халыкара интеллектуаль милек көне дип белдерү турында карар кабул итте. Шуннан бирле Россия Федерациясе, барлык дөньяви җәмгыятьләр кебек үк, ел саен бу бәйрәмне билгеләп үтә.

Конференцияне ачып, юстиция министры интеллектуаль милек көнен бәйрәм итүгә кушылучы хөкүмәтләр һәм оешмалар саны ел саен арта баруын билгеләп үтте. 23-26 апрель көннәрендә Интеллектуаль милек көннәре кысаларында Россия Федерациясе субъектларында бу вакыйгага багышланган чаралар үтте, ә Мәскәүдә “Россиядә интеллектуаль милек – 2008” Икенче Бөтероссия Форумы булды. Форумда Россиянең игълан ителгән инновацион стратегиясен гамәлгә ашыру шартлары һәм проблемалары һәм инновацион активлык программасын әзерләү өчен нигез сыйфатында дәүләт хакимияте органнары, фән һәм бизнес-оешмаларының беренче чираттагы гамәлләре турында фикер алышынды.

Быел Татарстан Республикасы да бу хәрәкәткә кушылды. Бүгенге конференция Татарстан Республикасында Интеллектуаль милек көннәрен үткәрү белән бәйле чараларны тәмамлый. Конференциядә чыгыш ясаган республиканың Интеллектуаль милек ФТИ директоры, юридик фәннәр докторы В.Н.Лопатин (Мәскәү) белдерүенчә, Халыкара көннәр кысаларында бөтенроссия күләмендәге чараларны ел саен үткәрү инициативасы яңгыраган, бу барлык РФ субъектларындагы бөтен мәйданнарда да Россиянең мәдәният, фән һәм техника казанышларын күрсәтү мөмкинлеге була дигән сүз. Бу башлангыч яклау тапкан.

Конференциядә катнашучылар интеллектуаль милек базарын барлыкка китерү, интеллектуаль милек нәтиҗәләрен коммерция әйләнешенә кертү,  интеллектуаль милек хокукларын яклау һ.б.ш. мәсьәләләре белән бәйле фикер алыштылар.