Дәүләтнең закон-хокук базасы камил булырга тиеш

Кичә Татарстан Республикасы Премьер-министры Р.Н.Миңнеханов ТР Хөкүмәте Йортында Халыкара хокук хезмәттәшлегенең Германия фонды директоры Матиас Веккерлингны кабул итте.

Очрашуда шулай ук ТР юстиция министры М.М.Корманов, ТР Президентының Дәүләт-хокук идарәсе җитәкчесе Р.А.Сахиева, Татарстан Премьер-министрының тышкы икътисадый эшчәнлек буенча ярдәмчесе И.Муфлиханов катнаштылар.

Очрашуны ачу барышында Премьер-министр һәр эшнең дә җитди хокукый нигезе булырга тиешлек турында ассызыклады. “Безнең хокук хезмәтләренең дөнья берләшмәсенә интегрирлашуында мәнфәгатьлебез, - дип билгеләп узды республика Хөкүмәте башлыгы.- Закон-хокук базасы камил булырга тиеш”.

Очрашу төгәлләнгәннән соң, Матиас Веккерлинг үзенең Татарстанга визитының төп максаты “Ярлыкау, җәзаларны үтәтү, наркотик матдәләрне куллану һәм сатуга бәйле җинаятьчелек һәм ювеналь юстиция” дигән 12 нче халыкара семинарда катнашу булуын искәртте, семинар исә 5-7 июнь көннәрендә Казанда үтәчәк.

Алман кунагы сүзләренә караганда, Германия фонды җинаятьчелекне кисәтү һәм аңа каршы көрәш алып бару мәсьәләләреннән кала хокук өлкәсендә белгечләр әзерләү белән дә шөгыльләнә. Ул хокук өлкәсендә яшь белгечләр әзерләүгә, шулай ук муниципаль өлкәдә белгечләрнең квалификациясен күтәрүгә булышлык итәргә әзер булулары турында җиткерде.

Халыкара хокук хезмәттәшлегенең Германия фонды ФРГ Федераль юстиция министрлыгы йөкләмәсе буенча 1992 елдан алып демократик хокук реформаларын үстерүгә, шул исәптән Россиядәгеләрне, фәнни һәм оештыру ягыннан булышлык итүгә юнәлтелгән эшчәнлек алып бара. Фондның төп максаты халыкара хокук хезмәттәшлегенә ярдәм итүдән гыйбарәт. Эшчәнлегенең тагын бер өстен ягы – суд хезмәтткәрләренең квалификациясен күтәрүгә булышлык итү һәм илкүләм законнарны Европа Союзы нормаларына яраштыру өлкәсендә партнер илләр белән хезмәттәшлек итү. Матиас Веккерлинг хәбәр иткәнчә, татарстан суд хезмәткәрләренең Германиягә стажировкага баруларын оештыру, шулай ук Казанда тематик семинарлар үткәрү мөмкинлеге мәсьәләләре карала.

Фондның россия партнерлары белән хезмәттәшлек итүе индивидуаль махсуслаштырылган проектлар рәвешендә гамәлгә ашырыла, алар германия хокук тәҗрибәсен россия законнарын үстерү барышында, суд практикасында нәтиҗәле куллануга юнәлтелгән. Фонд алман экспертларын бәяләмәләр язуга, аналитик белешмәләр әзерләүгә, конференция һәм семинарлар үткәрүгә җәлеп итү эшенә ярдәм итә, бу хокук өлкәсендә россия-германия профессиональ диалогына булышлык күрсәтү максатларыннан башкарыла. 

 «Татар-информ» агентлыгы материалларына нигезләнеп