Россиядә авыр тормыш ситуацияләренә тарыган балаларга ярдәм итү фонды эшли башлады

Җәй ахырында гына теркәү узу эшен тәмамлаган, Авыр тормыш ситуацияләрендә булган балаларга ярдәм итү фонды кичә төбәк министрлыкларыннан һәм ведомстволарыннан социаль сәясәт өчен җавап бирүче вәкилләрне тормышның авыр шартларына юлыккан балаларга ничек итеп реаль ярдәм күрсәтергә икәнен хәл итәр өчен җыйды. Алар арасында – ятимнәр, хокук бозучылар, караучысыз, урам балалары һәм инвалидлар бар.

Фонд җитәкчесе Марина Гордеева сүзләренчә, дәүләт үзенең старт капиталын керткән инде: 2008 елга 5 миллиард сумнан артык һәм шул ук күләмдә акча киләсе ике елга каралган. Фонд матди чараларны федераль бюджеттан гына түгел, бюджеттан тыш чыганаклардан да туплаячак, ягъни аның казнасын балалар язмышына битараф булмаган барлык кешеләр дә тулыландыра алачак дигән сүз.

Бүген илебездә балалар проблемалары белән ведомстволар, шул исәптән, Сәламәтлек саклау һәм социаль үсеш министрлыгы, Мәгариф һәм фән министрлыгы, Эчке эшләр министрлыгы, балигъ булмаганнар эшләре һәм аларның хокукын яклау буенча хөкүмәт комиссиясе шөгыльләнә. Фонд, аны булдыручылар вәгъдә иткәнчә, хакимият органнары эшен кабатламаячак. Аның эшчәнлеге нәтиҗәсе булып төбәкләрдә булган һәм гаилә белән балага ярдәм итүгә юнәлгән иң яхшы тәҗрибәләрне тарату торачак. Программаларга акча конкурс сайлаулары нәтиҗәләре буенча гына бүлеп биреләчәк. Аның критерийлары октябрь аена билгеләнгән попечительләр советы утырышында ахыргача билгеләнәчәк. Әлегә төбәкләр фонд вәкилләре гадәттән тыш хәлләргә генә игътибар бирмәсеннәр, булган проблемаларны комплекслы профилактикалау өстендә эшләсеннәр дигән тәкъдимнәр керттеләр.