ТР юстиция министры вазыйфаларын башкаручы С.Н.Столяров “Татмедиа” матбугат-конференциясендә

“Татмедиа” Татарстан Республикасының Массакүләм коммуникацияләр буенча агентлыгында һөнәри техникум һәм уку йортлары укучыларын торак белән тәэмин итү һәм бу өлкәдә ришвәтчелек мәсьәләләренә багышланган матбугат конференциясе узды. Анда сүз белем бирү учреждениеләренең ТР Хезмәт, халыкны эш белән тәэмин итү һәм социаль яклау министрлыгы карамагындагы тулай тораклары турында барды. Конференциядә ТР юстиция министры вазыйфаларын башкаручы С.Н.Столяров катнашты.

С.Н.Столяров матбугат конференциясендә катнашучыларга тулай торакта торак урыннарның хокукый режимы, шәхсән, гражданнарга аларның эш, уку, хезмәт итү вакытына тулай торактан торак урын бирү, торак урын бирү нигезләре, шулай ук торак биналарны арендалау килешүен туктату һәм өзү; торак бинага милекчелек хокукы күчү һәм андый биналарны хуҗалык карамагына тапшыру яки башка юридик затка тапшыру тәртибе турында сөйләде. Тулай торактагы яшәү урыныннан чыгару мәсьәләсенә аерым игътибар бирелде, чөнки торак өлкәсендәге законнар тулай торактан чыгарганда гражданнарны бүтән торак белән тәэмин итәргә куша.

РФ Торак кодексы нигезендә, торак белән тәэмин ителергә тиеш гражданнар категориясенә хәрбиләрнең гаилә әгъзалары, вазыйфаи затларның гаилә әгъзалары, көч органнары хезмәткәрләре, хезмәт бурычларын үтәгәндә вафат булган яки эзсез югалган кешеләрнең гаилә әгъзалары, картлык буенча пенсиядә булганнар, инвалидлыклары эш бирүче гаебе белән яки һөнәри чир аркасында килгән 1 һәм 2 төркем инвалидлар, хәрби хезмәттәгеләр саныннан хәрби бурычларын үтәгәндә яралану, контузия алган инвалидлар керә.

Алга таба махсус торак фондында булган торак биналарны арендага, наймга бирү, хосусыйлаштыруның тыелуы турында мәсьәләләр, шулай ук әлеге кагыйдәләргә моңарчы дәүләт һәм муниципаль учреждениеләре һәм оешмаларына караган, тулай торак сыйфатында файдаланылган йортларда урнашкан, җирле үзидарә органнары карамагына тапшырылган торак биналардан файдалану буенча искәрмәләр яктыртылды.