Гражданнарның веб-конференцияләрдә катнашуын тикшереп карау өчен Татарстан Җәмәгать судьялары суд участоклары билгеләнде
Гражданнарның суд утырышларында веб-катнашуы проектының нечкәлекләре турында Татарстан Юстиция министрлыгында өлкән җәмәгать судьялары белән узган киңәшмәдә фикер алыштылар.
Исегезгә төшерәбез, республика бу технологияне кертү өчен сынау төбәге итеп сайланды. Татарстан Республикасы Рәисе Рөстәм Нургали улы Миңнеханов проектның мөһимлеген ассызыклады һәм республика Юстиция министрлыгына аны судьялар белән бергә гамәлгә ашыруны тәэмин итәргә кушты.
Киңәшмә барышында Татарстан Республикасы юстиция министры Рөстәм Заһидуллин Авиатөзелеш, Вахитов, Әлмәт, Чаллы, Түбән Кама районнары судьяларына бу мәсьәләгә аерым игътибар бирергә кирәклеген ассызыклады. Нәкъ менә шушы районнарның суд участокларында тест үткәрү планлаштырыла.
“5 комплект җиһаз сатып алынган, - дип белдерде министр. Комплектларга телевизор, аның өчен кронштейнлы идән терәге, штативлы веб-камера керә. Әлегә аларны һәр районның бер залына урнаштыру планлаштырыла”, - диде ул.
Бу яңалык гражданнарга процесста веб-камера һәм микрофон белән җиһазландырылган мобиль җайланмалар яки компьютерлар ярдәмендә катнашырга мөмкинлек бирәчәк.
Рөстәм Заһидуллин элегрәк билгеләп үткәнчә, мондый практика федераль дәрәҗәдә юк, Татарстан яңа технологияне сынаучы беренче төбәк булды. Министр сүзләренчә, суд утырышына техник яктан тоташу мөмкин булса да, катнашучыларны идентификацияләү проблемасы кала: судья экранның теге ягында кемнәр булуын төгәл билгели алмый. “Идентификацияләү һәм аутентификацияләү технологияләрен кулланган яңа система, биометрик мәгълүматларны куллануны да кертеп, катнашучыларга процессның ышанычлылыгын тәэмин итеп, үз шәхесләрен расларга мөмкинлек бирәчәк”, - дип өстәде ул.