Рөстәм Заһидуллин гадел хөкем системасына ясалма интеллект кертү турында: “Ясалма интеллект судьяларга ярдәм итәчәк, әмма аларны алмаштыра алмаячак”
Казанда 3-4 октябрьдә IV Казан халыкара юридик форумы уза, анда барлык дәрәҗәдәге хакимият органнары вәкилләре, әйдәп баручы бизнес-структуралар һәм галим-юристлар хокукый системаны камилләштерүнең актуаль мәсьәләләре һәм юллары турында уртак фикер алышу өчен җыелган.
Дәүләт Думасының Дәүләт корылышы һәм законнар чыгару комитеты рәисе Павел Крашенинников, чарада чыгыш ясап, Казан форумының мөһим хокукый нормалар кабул ителә торган мәйданчык буларак аерым әһәмиятен ассызыклады. Ул быелның 19 июнендә үз көченә кергән җирле үзидарә турында яңа закон турында искә төшерде. Павел Владимирович әлеге законны әзерләгәндә Татарстанның, Дәүләт Советының һәм Юстиция министрлыгының зур эш башкаруын билгеләп үтте.
Форумда шулай ук цифрлаштыру контекстында Россия хокукый системасының киләчәге турында фикер алыштылар. Адвокат монополиясе проблемаларына, континенталь хокукый традиция өндәвенә һәм юриспруденциягә ясалма интеллект кертү перспективаларына аерым игътибар бирелде.
Татарстан Республикасы юстиция министры Рөстәм Заһидуллин, форумда күтәрелгән мәсьәләләргә аңлатма биреп, вакыт узу белән ясалма интеллект барлык өлкәләрдә, шул исәптән юридик өлкәдә дә кулланыла башлаячак, дип ассызыклады. Әмма, аның фикеренчә, ул судья ролендә була алмый, ә ярдәмче функциясе белән чикләнергә тиеш. “Кеше судка килгәч, законлылыкка гына түгел, ә карарның гаделлегенә дә өметләнә. Судья законга гына таянып түгел, тормыш тәҗрибәсен дә исәпкә алып эш итә. Ә ясалма интеллект мондый карарларны ничек кабул итәр соң? Гаделлекне ничек билгеләр? Бу мәсьәләләр бик мөһим һәм суд системасын цифрлаштырганда алар турында онытырга ярамый”, - дип ассызыклады министр.