Татарстан җәмәгать судьялары дәүләт органнары белән цифрлы хезмәттәшлеккә күчә
Татарстан Республикасы Юстиция министрлыгы коллегиясендә җәмәгать судьяларының суд участоклары эшенә электрон запрослар кертү нәтиҗәләрен тәкъдим иттеләр. Бу кәгазь документлар әйләнешен киметергә һәм Эчке эшләр министрлыгыннан, Роскадастрдан һәм Федераль салым хезмәтеннән мәгълүмат алуны тизләтергә мөмкинлек бирде.
Юстиция министры урынбасары Марат Низамиев, доклад белән чыгыш ясап, “Җәмәгать судьялары” программа комплексын эшләп бетерүнең әһәмиятен ассызыклады. Ул августта тәмамланды.
“Программа комплексын модернизацияләүне төгәлләү төп дәүләт структуралары белән мәгълүматлар алмашу процессын автоматлаштырырга мөмкинлек бирде. Элек почта аша елына 43 меңгә якын мөрәҗәгать җибәрелгән булса, бүген без мәгълүмат алу срокларын сизелерлек кыскарту, шул ук вакытта конфиденциальлек дәрәҗәсен арттыру турында сөйли алабыз”, – дип билгеләп үтте Марат Низамиев.
Коллегиядә китерелгән мәгълүматларга караганда, бу елның августында электрон хезмәттәшлек системасын гамәлгә керткәннән бирле Татарстанның җәмәгать судьялары тарафыннан 700 электрон мөрәҗәгать җибәрелгән, шуларның 385 е – Россия Эчке эшләр министрлыгына, 230 ы – Роскадастрга һәм 85 е – Федераль салым хезмәтенә.
Шул ук вакытта министр урынбасары эштәге проблемалы моментларга да игътибар итте. “Россия Федераль салым хезмәте биргән аналитикага караганда, аларны электрон форматта алу мөмкинлеге булуга карамастан, 2025 елның сентябрендә кәгазьдә җибәрелгән 100дән артык запрос теркәлгән”, - диде Марат Низамиев. Ул шулай ук проблеманың Казанның Совет һәм Яңа Савин районнарының аерым суд участокларына, шулай ук Чистай һәм Киров районының суд участокларына кагылуын искәртте. “Үзара чыгымнарны киметү һәм почтага финанс чыгымнарын киметү өчен электрон сервислардан активрак файдаланырга кирәк”, - дип ассызыклады министр урынбасары.
Җәмәгать судьяларын Халыкның бердәм федераль мәгълүмат регистрына (ХБР) тоташтыру мөһим казаныш булды.
“Россия Югары Суды каршындагы Суд департаментының ХБР белән судларның цифрлы хезмәттәшлеген гамәлгә ашыру турындагы октябрь карары киләчәккә зур адым булды. Хәзер җәмәгать судьялары бер запрос җибәреп гражданнар турында, моңа кадәр электрон рәвештә алып булмаган мәгълүматны да кертеп, 30дан артык төр актуаль мәгълүмат алырга мөмкин”, - дип ассызыклады министр урынбасары.
Ахырда Марат Низамиев барлык хезмәттәшләренә нәтиҗәле хезмәттәшлек өчен рәхмәт белдерде. “Җәмәгать судьялары аппаратына һәм судьяларга аларның авыр, әмма бик мөһим хезмәтләре өчен аерым рәхмәт белдерәсем килә. Сезнең эшегез югары профессионализм, сабырлык һәм зирәклек таләп итә”, - дип билгеләп үтте министр урынбасары.
Ул Министрлык алдында җәмәгать судьяларын матди-техник һәм оештыру ягыннан тәэмин итүне камилләштерү буенча мөһим стратегик бурычлар торуын, ә аларны хәл итү барлык кызыксынган якларның бердәм һәм килешеп эшләве шартларында гына мөмкин булуын ассызыклады.