Татарстан Республикасы юстиция министры җирле үзидарә турында яңа законны гамәлгә ашыру турында сөйләде
“Татарстан Республикасы Муниципаль берәмлекләре советы” ассоциациясенең XX съездына әзерлек кысаларында онлайн-конференция узды. Анда республика юстиция министры Рөстәм Заһидуллин чыгыш ясады. Фикер алышуның төп темасы гавами хакимиятнең бердәм системасында җирле үзидарәне оештыруның гомуми принциплары турындагы федераль законны гамәлгә ашыру булды.
“Бу бүгенге көндә республика муниципаль берәмлекләре өчен аеруча актуаль һәм әһәмиятле тема. Министрлыкта федераль закон яңалыкларын исәпкә алып, җирле үзидарә органнары эшчәнлеге мәсьәләләренә аерым игътибар бирелә - бу бүген безнең эшнең төп юнәлешләренең берсе”, - диде Рөстәм Заһидуллин.
Министр хәбәр иткәнчә, федераль закон төбәк законнарын һәм муниципаль законнарны 2027 елның 1 гыйнварына кадәр тәңгәлләштерергә куша. Татарстан Дәүләт Советында республиканың җирле үзидарәнең төрле аспектларын җайга сала торган 71 законына үзгәрешләр кертү турында закон проекты карала инде.
Рөстәм Заһидуллин ассызыклаганча, төзәтмәләрне эшләгәндә җирле үзидарәне оештыруның ике дәрәҗәле системасын саклап, вәкаләтләрне бүлү мәсьәләсенә аерым игътибар бирелә. Оптималь модельне эшләү өчен республика Юстиция министрлыгы “Муниципаль берәмлекләр советы” Ассоциациясе белән берлектә республика башкарма хакимият органнары һәм муниципалитетлар позицияләренә анализ ясады.
“Киңәшмәләрдә уртак фикер алышулар нәтиҗәләре буенча кабул ителгән вәкаләтләрне бүлүнең йомгаклау моделе җирле үзидарә турындагы республика законына төзәтмәләр проектында исәпкә алынды”, - диде министр.
Министр билгеләп үткәнчә, алда күп вакыт таләп итә торган эш тора, анда бөтен гавами хакимият органнарының бергәләп катнашуы мөһим. “Киләчәктә эшне урыннарда нәтиҗәле оештыру, димәк, халыкның тормыш эшчәнлеген турыдан – туры тәэмин итү мәсьәләләрен хәл итү шуңа бәйле булачак”, - дип ассызыклады Рөстәм Заһидуллин.