Татарстанда административ штрафларның максималь күләмен арттыру турында фикер алыштылар
Татарстан Республикасы Юстиция министрлыгында Хокук мәсьәләләре буенча ведомствоара координация комитетының эш төркеме утырышы булды. Фикер алышуның төп темасы региональ законнарда каралган хокук бозулар өчен гражданнарга билгеләнә торган административ штрафлар күләменең югары чиген яңадан карау инициативасы иде. Очрашу барышында Санкт-Петербургның Закон чыгару җыенының хокук бозучылар өчен акчалата түләтүнең чик күләмен арттыруга юнәлдерелгән тиешле федераль закон проектын әзерләве билгеләп үтелде.
Эш төркеме әгъзалары билгеләп үткәнчә, 5000 сумлык административ штраф федераль законнарда 2007 елда ук билгеләнгән һәм ул вакыттан бирле яңадан каралмаган.
“Бүгенге көндә гражданнар өчен административ штраф күләмен чикләү аерым очракларда административ җәза максатларына нәтиҗәле ирешергә мөмкинлек бирми һәм агымдагы икътисадый чынбарлыкка туры килми”, - дип ассызыкладылар утырышта катнашучылар.
Экспертлар фикеренчә, административ җәза дәүләт тарафыннан кылынган гамәлне тискәре бәяләүне белдереп кенә калмыйча, профилактик функцияне дә үтәргә тиеш.
“Административ хокук бозулар турында Россия Федерациясе кодексының 3.1 статьясының 1 өлеше нигезендә административ җәза хокук бозучының үзе һәм башка затлар тарафыннан яңа хокук бозулар кылуны кисәтү максатларында кулланыла. Әмма гамәлдәге чикләүләр тиешле превентив эффектны тәэмин итми”, - диделәр утырышта.
Фикер алышу барышында соңгы елларда халык керемнәренең шактый артуын күрсәтә торган икътисадый күрсәткечләр китерелде.
“Шуны да истә тотарга кирәк, әлеге чикләүне керткәннән бирле халыкның реаль керемнәре күп тапкырлар артты. Әгәр 2007 елда Россиядә уртача хезмәт хакы 13 518 сум булса, 2024 елда бу күрсәткеч 83 656 сумга җитте”, - диделәр эшче төркем әгъзалары.
Утырыш йомгаклары буенча административ штрафларны заманча икътисадый чынбарлыкка туры китерү һәм хокук бозуларны кисәтү бурычларын хәл итүдә нәтиҗәлелекне тәэмин итү өчен югары чикләрне төзәтү кирәклеге турында карар кабул ителде.