Татарстан Республикасы Дәүләт Советында Юрист көне

2008 елның 3 декабрендә Татарстан Республикасы Дәүләт Советының кече залында Юрист көнен бәйрәм итүгә багышланган тантаналы чара булып узды. Бәйрәмгә республика министрлыклары һәм ведомстволары, федераль территориаль структуралары, суд, прокуратура, адвокатура, акционерлык җәмгыятьләре һәм компанияләре юристлары чакырылган иде. Билгеле булганча, 2008 елда Россия Федерациясе Президенты Указы нигезендә илебез юристлары үзләренең һөнәри бәйрәмнәрен быел беренче тапкыр билгеләп үттеләр.

Тантаналы чараны ТР юстиция министры – Россия юристлары берлегенең Татарстан төбәк бүлеге рәисе М.М.Корманов ачты. Ул җыелган хезмәттәшләрне һөнәри бәйрәм белән кайнар котлады һәм эшләрендә зур уңышлар, Ватаныбыз чәчәк атсын өчен яңа үрләр яулауларын теләп калды.

ТР юстиция министры М.М.Корманов 2008 елның 3 декабрендә “Республика Татарстан” һәм “Ватаным Татарстан” газеталары аркылы Татарстан һәм Россиянең барлык юристларын һөнәри бәйрәмнәре белән котлады. Юристларны һөнәри бәйрәмнәре белән шулай ук ТР Дәүләт Советы рәисе урынбасары А.П.Гусев, Татарстан Республикасы прокуроры К.Ф.Әмиров, ТР Президентының Дәүләт-хокук идарәсе җитәкчесе Р.А.Сәхиева котладылар.

Аннары Татарстан Республикасы Президентының 2008 елның 2 декабрендәге “Татарстан Республикасының атказанган юристы” дигән мактаулы исем бирә торган Указы яңгыратылды. Бу зур исемгә ТР Министрлар Кабинеты, ТР Прокуратурасы, ТР Юстиция министрлыгы, ТР буенча Эчке эшләр министрлыгы, ТР Адвокатлар палатасының бер төркем хезмәткәре лаек булды. Бүләкләнгәннәрне Республикабыз Президенты исеменнән ТР Дәүләт Советы рәисе урынбасары А.П.Гусев котлады һәм бүләкләр тапшырды.

Татарстан Республикасы Юстиция министрлыгында бүләккә ТР юстиция министрының беренче урынбасары С.Н.Столяров, ТР юстиция министры урынбасары А.А.Ощепков, ТР юстиция министры киңәшчесе А.М.Чашин алдылар.

Чараның дәвамы буларак юстиция министры М.М.Корманов Россия юристлары берлегенең Татарстан төбәк берлеге әгъзаларына юристлар иҗтимагый оешмасына кергәнлекләре хакындагы таныклыклар тапшырды. Бүгенге көнгә юристларның Татарстан төбәк берлегендә 108 кеше әгъза булып тора. Чара бәйрәм фуршеты белән тәмамланды.

 

ТР Юстиция министрлыгы Матбугат хезмәте