Татарстан Республикасы Юстиция министрлыгы приз фонды 200 мең сумлык Державин республика премиясенә гаризалар кабул итә башлады
Татарстанда юриспруденция өлкәсендә Гавриил Романович Державин исемендәге республика премиясенә конкурста катнашу өчен эшләр кабул итү башланды. Лауреат 200 мең сум күләмендә акчалата бүләк алачак.
“Державин исемендәге премия республикада юридик фикерне үстерү өчен әһәмиятле стимул булды. Без заманча хокук фәненә сизелерлек өлеш кертәчәк эшләрне күрербез дип ышанабыз”, - диде республика Юстиция министрының беренче урынбасары Илья Гомзик.
Г.Р. Державин исемендәге республика премиясе юристларга юриспруденция өлкәсендә фәнни тикшеренүләре (монографияләре) өчен, шулай ук әдәбият өлкәсендә киң танылган, рус һәм (яки) татар телендә иҗат ителгән һәм Г. Р. Державин иҗатын популярлаштыручы аеруча әһәмиятле әсәрләре өчен язучыларга бирелә.
Премия чиратлап: бер елда - әдәбият өлкәсендә, икенче елда - юриспруденция өлкәсендәге хезмәтләр өчен бирелә. 2026 елда лауреат юридик берләшмә вәкиле булачак.
Конкурс шартлары буенча, фәнни эшләр соңгы биш ел дәвамында, ләкин премиягә тәкъдим ителүгә бер елдан да соңга калмыйча бастырып чыгарылган булырга тиешләр. Республика башкарма хакимияте органнары, фәнни һәм иҗтимагый оешмалар, югары уку йортлары, мәдәният учреждениеләре, шулай ук җирле үзидарә органнары да үз кандидатларын күрсәтә ала.
“Державинның хезмәтләре, аның дәүләт эшчәнлеге бүген дә актуаль булып кала. Конкурска тәкъдим ителгән эшләр заманча юридик проблемаларны чагылдырып кына калмыйча, аларны хәл итүгә инновацион алымнар да тәкъдим итәргә тиеш”, - дип ассызыклады министрның беренче урынбасары.
Премиягә дәгъва итәчәк эшләр 2026 елның 23 маена кадәр Татарстан Республикасы Юстиция министрлыгында түбәндәге адрес буенча кабул ителә: 420111, Казан ш., Кремль ур., 16 йорт, 102 кабинет. Өстәмә мәгълүматны 8 (843) 222-60-51 телефоны буенча алырга мөмкин.