Татарстанда 2022 елдан бирле 8 меңнән артык сугышчы һәм аларның гаилә әгъзалары түләүсез юридик ярдәм алды
Татарстанда Россия Юстиция министрлыгының Юридик ярдәм һәм хокукый хезмәтләрне үстерү һәм җайга салу департаменты директоры Роман Рябой җитәкчелегендә юридик ярдәм һәм хокукый хезмәтләр күрсәтү мәсьәләләре буенча киңәшмә узды.
Татарстан Республикасы юстиция министрының беренче урынбасары Илья Гомзик республикада түләүсез юридик ярдәм системасы эше турында сөйләде, махсус хәрби операциядә катнашучыларга ярдәм итүгә аерым игътибар бирде.
“Махсус хәрби операция башланганнан бирле Министрлык анда катнашучыларга һәм аларның гаилә әгъзаларына хокукый ярдәм күрсәтүдә катнаша. 2022 елдан башлап махсус хәрби операциядә катнашучы 8 081 кешегә һәм аларның гаилә әгъзаларына хокукый ярдәм күрсәтелде”, - диде Илья Гомзик.
Министрның беренче урынбасары юридик хезмәтләрне цифрлаштыру мәсьәләләренә аерым тукталды. Илья Александрович “Татарстан Республикасында яшәүче картасы” мобиль кушымтасы турында сөйләде, анда “Юридик ярдәм” дип аталган махсус бүлек булдырылган.
2025 елда кушымта аша 121 кеше түләүсез юридик ярдәм алды. Кушымтаны барлыгы 344 мең кулланучы йөкләп алган, шуларның 5 меңнән артыгы “Юридик ярдәм” бүлегенә мөрәҗәгать иткән.
Моннан тыш, республика халкы хәзер юридик консультацияләрне видеоэлемтә буенча ала ала.
“Әлеге хезмәттән файдалану өчен КФҮ (МФЦ) нең якындагы пунктына мөрәҗәгать итеп, хезмәткәргә түләүсез юридик консультация алу теләге барлыгын әйтергә кирәк”, - дип аңлатты Илья Гомзик.