Татарстан Республикасы юстиция министры Рөстәм Заһидуллин Алабуга районында яшәүчеләр белән очрашты
Татарстан Республикасы юстиция министры Рөстәм Заһидуллин эш визиты белән Алабуга районында булды. Олы Шүрнәк авылында министр авыл җирлеге Советының хисап утырышында катнашты. Башта гражданнарны кабул итү оештырылды, анда яшәүчеләр җир кишәрлекләрен рәсмиләштерү, видеокүзәтү системаларын урнаштыру һәм юл өслеген ремонтлауга кагылышлы сораулар белән мөрәҗәгать иттеләр.
Эш сәфәре кысаларында шулай ук министр “Кастамону Интегрейтед ВудИндастри” ҖЧҖ хезмәт коллективы белән очрашты. Чаралар традицион гражданнар җыеннары форматында узды, алар узган елга йомгак ясау һәм киләчәккә планнар турында фикер алышу өчен үткәрелә.
Очрашулар барышында республиканың социаль һәм икътисадый үсеше мәсьәләләре турында сөйләштеләр. Министр шулай ук халыкка республикада булачак мөһим вакыйгалар турында да хәбәр итте.
“2026 елда мөһим вакыйгалар күп булачак: күренекле шагыйрь Габдулла Тукайның 140 еллыгы, Муса Җәлил, Дмитрий Сергеевич Лихачев, Сара Садыйкова һәм илебез мәдәнияте символлары булган башка күренекле шәхесләрнең 120 еллыгы узачак”, - диде министр.
Ул шулай ук бу вакыйгаларның Россия халыклары бердәмлеге елында аеруча әһәмияткә ия булуын билгеләп үтте: “Планлаштырылган чаралар конструктив дәүләти-дини хезмәттәшлекне ныгытуга, милләтара һәм конфессияара мөнәсәбәтләрне гармонияләштерүгә, күпмилләтле халкыбызның бердәмлеген ныгытуга ярдәм итәчәк”.