Хокукый мәсьәләләр буенча Ведомствоара координация комитеты утырышы

Кичә Татарстан Республикасы Министрлар Кабинетында видеоконференция режимында Татарстан Республикасы Премьер-министрының беренче урынбасары Р.Ф.Моратов рәислегендә хокукый мәсьәләләр буенча Ведомствоара координация комитеты утырышы узды.

Көн тәртибенең төп пункты булып ТР юстиция министрының “2008 елда Татарстан Республикасының муниципаль районнарында Хокук бозуларны профилактикалау буенча эш торышы турында”гы доклады булды (Мөслим, Лениногорск, Бөгелмә, Зеленодольск, Югары Ослан, Лаеш, Апас, Кайбыч, Кама Тамагы, Алабуга, Минзәлә, Мамадыш муниципаль районнары мисалында).

Юстиция министры үз чыгышында моңарчы эшләнгән эшләр турында һәм халык арасында хокук бозуларны профилактикалау буенча күрелә торган чаралар турында сөйләде, балигъ булмаганнар эшләре һәм аларның хокукларын саклау буенча комиссияләр эшчәнлеген, шулай ук югарыда саналган районнардагы административ комиссияләр эшендәге кискен мәсьәләләрне дә яктыртты.

Комитет утырышында Кама Тамагы, Алабуга муниципаль районнарындагы хокук бозуларны профилактикалау мәсьәләсен ТР “Кама Тамагы муниципаль районы” муниципаль берәмлеге башкарма комитеты җитәкчесе Р.Ф.Вәлиев һәм ТР Алабуга муниципаль районы башлыгы урынбасары В.С.Чершинцев сөйләделәр.

Ведомствоара комитет әгъзалары Татарстан Республикасының белем бирү учреждениеләрендә укучылар белән күпдәрәҗәле профилактика системасы турында сөйләгән ТР мәгариф һәм фән министры урынбасары А.К.Зиннуровны тыңладылар.

Комитет утырышында “Җир асты байлыклары турында” Татарстан Республикасы Законына аерым үзгәрешләр кертү хакында”, “Татарстан Республикасының Тарифлар буенча комитеты оешу сәбәпле Татарстан Республикасының аерым закон актларына үзгәрешләр кертү турында”, “Татарстан Республикасының муниципаль норматив хокукый актлары регистры турында” ТР закон проектлары, шулай ук “Этил спирты, алкогольле һәм составына спирт кергән продукция җитештерүне һәм аның әйләнешен дәүләт җайга салуы турында” Федераль законга үзгәрешләр кертү хакында” Федераль закон проекты тикшерелде һәм хупланды.

“Татарстан Республикасы территориясендә автомобиль юллары һәм юл эшчәнлеге турында”, “Наркомания һәм токсикоманияне профилактикалау турында” ТР закон проектларын эшләп бетерергә тәкъдим ителде.

 

ТР Юстиция министрлыгы Матбугат хезмәте