Әлмәттә ишегалды территорияләрен яхшырту турында фикер алыштылар
Бүген Әлмәттә Татарстан Республикасы Дәүләт Советының Дәүләт корылышы һәм җирле үзидарә комитеты һәм Комитет каршындагы Экспертлар советының күчмә уртак утырышы булды. Фикер алышуның төп темасы җирле үзидарә органнарының ишегалды территорияләрен яхшырту өлкәсендәге вәкаләтләрен гамәлгә ашыру перспективалары булды.
Утырыш барышында юстиция министрының беренче урынбасары Илья Гомзик ассызыклаганча, 2025 елның 20 мартындагы 33-ФЗ номерлы Федераль закон нигезендә ишегалды территорияләрен яхшырту җирле үзидарә органнары вәкаләтләренә кертелгән. Аның сүзләренчә, республика законы проекты бу функцияләрне җирлекләр һәм шәһәр округлары дәрәҗәсенә тапшыра. Мондый алым шәһәрләрдә һәм авылларда тормыш сыйфатын яхшыртуга юнәлдерелгән
“Мондый территорияләрне яхшырту өлкәсендә вәкаләтләрне гамәлгә ашыру перспективасы торак, җир законнары һәм шәһәр төзелеше киселешендә ята”, - диде Илья Гомзик.
Ул шулай ук законнарда “ишегалды эчендәге территорияләр” төшенчәсенең төгәл билгеләнмәвенә игътибар итте, бу хокукый билгесезлекләр тудыра. Аларны бетерү өчен җирле үзидарә органнарына җир кишәрлекләре бүленешен актуальләштерү тәкъдим ителде. Бу яңа вәкаләтләрне нәтиҗәле планлаштыру һәм гамәлгә ашыру өчен нигез булдырачак.