Дәүләт Думасы барлык төр сайлаулар вакытында залог кертүне туктату турындагы закон проектын карап тикшерәчәк

Дәүләт Думасы барлык төр сайлаулар вакытында залог кертүне туктату турындагы инициативаны карап тикшерергә ниятли. РФ Федераль Җыены Дәүләт Думасының “Бердәм Россия” фракциясенең рәсми сайты хәбәр иткәнчә, әлеге закон проекты фикер алышуга икенче укылышта чыгарылачак.

Беренче укылышта, пермьнең закон чыгару органнары тәкъдиме буенча, бары тик Дәүләт Думасына сайлаулар вакытында гына залог кертүне туктату нормасы кабул ителде, ә төбәкләрдә исә сайлау фонды күләменең 10-15 проценты күләмендә кулланылуы рөхсәт ителгән иде. Ләкин бер үк вакытта бәйсез инициатива белән Ирина Яровая җитәкчелегендәге “Бердәм Россия” партиясе вәкилләре чыгыш ясады. Аларның тәкъдиме барлык төр сайлаулар вакытында залог кертүне туктатуга кагыла.Үз чиратында, Дәүләт Думасының конституция законнары һәм дәүләт төзелеше комитеты “пермь”нең закон проектын барлык сайлаулар системасына тарату тәкъдиме белән чыгыш ясады.

Комитет тәкъдиме нигезендә, хәзер сайлап куела торган вазыйфаларга кандидатлар мәҗбүри рәвештә сайлаучылар имзасын алырга тиеш булалар. Парламент партияләре артыннан сайлауларда имзалар җыюдан тыш катнашу хокукы саклана. Закон проекты “Сайлау хокукларының төп гарантияләре һәм РФ гражданнарының референдумда катнашу хокукы турында” һәм “РФ Федераль Җыены Дәүләт Думасы депутатларын сайлау турында” законнарына төзәтмәләр кертә һәм сайлауларда кандидатлар исемлегенә чыгаруны тәэмин итү төре буларак акча залогы институтын юк итүгә юнәлдерелгән. Залог кертүне туктату турындагы закон проекты РФ Президенты Дмитрий Медведев йөкләмәсен гамәлгә ашырып эшләнде.

Дәүләт башлыгы узган елның ноябрендә Федераль Җыенга Юлламасы белән чыгыш ясаганда барлык төр сайлауларда катнашу өчен партияләр тарафыннан залог кертүне туктатырга тәкъдим итте, чөнки, аның фикеренчә, партия язмышын “акча түгел, ә бәлки кешеләр фикере, партиянең абруе һәм сайлаучыларның партия программасына булган ышанычы хәл итәргә тиеш”. Россиядә сайлау залогы беренче тапкыр 1999 елда, исемлекне теркәү өчен имзалар саны җитәрлек булмаган яки бөтенләй булмаган очракларда кандидатларга һәм сайланучы оешмаларга сайлауларда катнашу хокукын тулаем гарантияли торган саклык чарасы буларак кертелде. Профильле комитетның йомгаклавында билгеләнгәнчә, сайлау хокукына алып бара торган юлның үзгәрүе хәзер әлеге “саклык чарасыннан” баш тарту мөмкинлеген бирә.

2007 елдагы парламент сайлауларында сайлау залогы белән “Яблоко”, СПС, “Россия Патриотлары” һәм “Гадел Россия” партияләре файдаланды. Алардан Дәүләт думасына нибары “Гадел Россия” партиясе генә сайлана алды. 3 процент чиген уза алмаган партияләргә залог буларак кертелгән 60 млн.сумга якын акчаларын закон буенча кайтармадылар.

 

www.regions.ru