Татарстан Республикасы Судьялары советында

Кичә Татарстан Республикасы юстиция министры урынбасары Ә.Б.Сираҗетдинов Татарстан Республикасы Судьялары советының республика судларын финанслау мәсьәләсенә багышланган утырышында катнашты.

Сүз федераль судларны һәм җәмәгать судьяларын финанслау турында барды. Республиканың җәмәгать судьяларын матди-техник һәм финанс белән тәэмин итү һәм бу максатларга каралган бюджет акчаларын тоту мәсьәләсе хакындагы мәгълүмат белән министр урынбасары Ә.Б.Сираҗетдинов һәм ТР Юстиция министрлыгының финанс бүлеге җитәкчесе урынбасары Е.С.Гусева чыгыш ясадылар.

Аерым алганда, 2008 елда җәмәгать судьялары эшчәнлеген тәэмин итү өчен республика бюджетыннан 160,5 млн.сумнан артык акча бирелүе билгеләп үтелде, бу 2007 елда бирелгән акчадан 44,9 млн.сумга артыграк, шул исәптән – хезмәт хакларын түләүгә -111,7 млн.сум, көндәлек чыгымнарга 37,8 млн.сум, капиталь кертемнәр (төп чараларны сатып алуга) 4,5 млн.сум, башка чыгымнарга – 6,2 млн.сум тотылды.

Татарстан Республикасы Министрлар Кабинеты карарлары нигезендә бирелә торган өстәмә финанс чыганаклары 2008 елда 17,5 млн.сум тәшкил итте, шулардан 10 млн. сум җәмәгать судьяларының суд участоклары биналарына капиталь һәм агымдагы ремонт эшләрен уздыруга; 2,2 млн.сум элемтә хезмәтләренә; 0,6 млн.сум автомашиналар сатып алуга һәм 2,5 млн.сум адаптацион түләүләргә һәм бердәм тариф челтәре буенча эшләүче хезмәткәрләргә хезмәт хакын арттыруга бирелде. Шул рәвешле ТР Юстиция министрлыгының “суд системасы” бүлеге буенча 2008 елдагы бюджеты тулысынча үтәлгән.

Җәмәгать судьяларының суд участоклары биналарында ремонт эшләрен башкару Министрлык эшенең иң мөһим юнәлеше булып тора. Бу максатларга 2008 елда бюджеттан 2,5 млн.сум бирелде, алар Әлмәт, Буа, Менделеевск, Зәй, Чистай, Яшел Үзән, Түбән Кама, Казан шәһәрләрендә, Кукмара, Аксубай һәм Байлар Сабасы бистәләрендә, Олы Кайбыч авылында җәмәгать судьялары биналарын төзекләндерүгә тотылды.

Юстиция министрлыгының Татарстан Республикасы Җир һәм мөлкәти мөнәсәбәтләр министрлыгы һәм җирле үзидарә органнары белән бергә алып барылган эшчәнлеге нәтиҗәсендә Зәй муниципаль районында, Казан шәһәренең Совет районы, Яр Чаллы, Алабуга шәһәрләре җәмәгать судьяларының суд участоклары мәйданнарын киңәйтү мәсьәләсе хәл ителә.

Хәзерге вакытта җәмәгать судьяларының суд участокларын канцелярия һәм хуҗалык кирәк-яраклары белән тәэмин итү мәсьәләсе тулысынча хәл ителде.

Үткән елны Министрлык тарафыннан судларны мәгълүматлаштыру дәрәҗәсен күтәрүгә юнәлдерелгән чаралар күрелде, шул ук вакытта төп көч суд эшенә электрон-исәпләү техникасын кертү буенча практик чараларга һәм аннан файдалануның нәтиҗәлелеген арттыруга сарыф ителде.

Бүген Министрлык суд эш башкаруы комплекслы мәгълүмат системасын кертүгә йөз тота. Бу исә җәмәгать судьясының суд участогындагы эшләр һәм материалларның тулы банкын булдыру, суд эш башкаруы процессының нәтиҗәлелеген күтәрү мөмкинлеген бирә. Бу сәбәпле Министрлык тәкъдиме белән әлеге проект “Татарстан Республикасында мәгълүмати һәм коммуникацион технологияләрне үстерү һәм файдалану (“Электрон Татарстан” 2008-2010 еллар)” Республика максатчан программасы чаралары исемлегенә кертелде.

 

ТР Юстиция министрлыгының Матбугат үзәге