“Иң яхшы муниципаль хезмәткәр” Бөтенроссия конкурсы турында

“Муниципаль Академия» Бөтенроссия иҗтимагый оешмасы (Мәскәү шәһәре) РФ Федераль Җыены Федерация Советының Җирле үзидарә мәсьәләләре буенча комитеты, РФ Федераль Җыены Дәүләт Думасының Җирле үзидарә мәсьәләләре буенча комитеты, РФ Президенты Администрациясе ярдәме белән “Иң яхшы муниципаль хезмәткәр” Бөтенроссия конкурсын уздыру турында хәбәр итә. Әлеге конкурс җирле үзидарә өлкәсендә уңышларга ирешкән муниципаль хезмәткәрләрне ачыклау һәм аларга һәртөрле ярдәм күрсәтү, муниципаль хезмәткәр һөнәренең абруен күтәрү, шулай ук алдынгы тәҗрибәне киң колачлап пропагандалау максаты белән үткәрелә.

Җирле үзидарә мәсьәләләре белән бәйле конкурс җиденче ел рәттән үткәрелә. Россиянең 73 төбәгеннән 1100 дән артык кеше әлеге конкурс лауреатлары булуга иреште.

Конкурс турындагы нигезләмә нигезендә әлеге конкурста муниципаль хуҗалык һәм җирле үзидарәне үстерү өлкәсендә уңышларга ирешкән муниципаль хезмәткәрләр, муниципаль хезмәт хезмәткәрләре; җирле үзидарәнең башкарма һәм вәкиллекле органнарының җитәкче хезмәткәрләре; фәнни хезмәткәрләр, югары уку йортларының профессор-укытучылар составы вәкилләре; муниципаль хуҗалык һәм җирле үзидарә, муниципаль икътисад һәм социаль сәясәт өлкәсендәге белгеч-экспертлар һәм җирле үзидарә мәсьәләләре белән шөгыльләнүче башка затлар катнаша ала.

Конкурста катнашу өчен документлар Муниципаль Академиягә Татарстан Республикасы Муниципаль берәмлекләре Советы аркылы җибәрелә.

 

ТР Юстиция министрлыгының Матбугат үзәге