1 гыйнвардан балалар бакчасы өчен компенсациягә керем салымы буларак түләнгән акчалар гаилә бюджетына кайтарылачак

Кичә Дәүләт Думасы депутатлары күпчелек тавыш белән “РФ Салым кодексының икенче бүлегендәге 217 статьясына үзгәреш кертү турында” закон проектын икенче укылышта кабул иттеләр.

Закон проекты мәктәпкәчә белем бирү учреждениеләренә йөрүче балалары булган ата-аналарга кагыла. Ул балалары булган гаиләләргә дәүләт ярдәмен күрсәтүне алга таба көчәйтүгә һәм аларның мәктәпкәчә белем бирү оешмалары хезмәтләренә булган ихтыяҗларын тәэмин итүгә юнәлдерелгән.

“Белгәнегезчә, 2007 елдан балалар бакчасына түләнә торган акчаның бер өлеше ата-аналарга федераль бюджет хисабыннан компенсацияләнүне керткән закон гамәлдә. Беренче балага-20%, икенче балага-50%, өченче балага-70% тәшкил итә. Ләкин хәзерге вакытта ата-аналар компенсация буларак ала торган акчаларга физик затлардан алына торган 13% күләмендә керем салымы алына. Закон проекты әлеге акчаны салымнан азат итәргә тәкъдим итә”- дип аңлатты журналистларга автордашларның берсе, Бюджет һәм салым буенча комитет рәисе урынбасары Галина Карелова.

Икенче укылыш вакытында ике иң мөһим төзәтү расланды дип өстәде ул. “Элек закон текстында балалары муниципаль һәм дәүләт белем бирү учреждениеләренә йөрүче ата-аналар акчасына кагыла дип билгеләнгән иде. Төзәтүләрдән соң “муниципаль һәм дәүләт” сүзләре закон текстыннан алыначак. Хәзер сүз “ төп мәктәпкәчә гомуми белем бирү программасын гамәлгә ашыручы белем бирү учреждениеләре турында бара”,-дип билгеләп үтте депутат. –Дәүләт Думасы балалары дәүләтнеке булмаган балалар бакчаларына йөрүче ата-аналарга да компенсация алу хокукын бирә торган, “Мәгариф турында” РФ Законының 52 һәм 52.2 статьяларына үзгәрешләр кертү хакында” федераль закон проектын беренче укылышта кабул итүне исәпкә алсак, бу бик тә мөһим.  Шулай итеп, ике закон да кабул ителгәч, мәктәпкәчә белем бирү учреждениеләренә йөрүче балаларның ата-аналары балалар бакчасына түләүнең бер өлешенә компенсациягә салымнан азат ителәчәкләр.

Икенче укылышта кабул ителгән икенче мөһим төзәтү законның яңа нигезләмәләре көченә кергәч, аларның көчләре “2009 елның 1 гыйнварыннан барлыкка килгән, хокук мөнәсәбәтләренә” кагылачагы турында сөйли. Ягъни, 1 гыйнвардан балалар бакчасы өчен компенсациягә керем салымы буларак түләнгән акчалар гаилә бюджетына кире кайтарылачак.

Яңа закон проектын тагын кризиска каршы бер мөһим чара дип санарга була. Ул дәүләтнең башка ярдәм чаралары (быелдан ана капиталыннан файдалану, ана булу белән бәйле пособияләр күләмен арттыру) белән беррәттә балалы гаиләләрнең хәлен җиңеләйтергә тиеш”,-дип нәтиҗә ясады Карелова.

 

www.Legis.ru