Иҗтимагый палата Балигъ булмаганнар эше буенча судьялар ассоциациясен оештырырга тәкъдим итә

10 июнь көнне Иҗтимагый палата бинасында узган “Россиядә ювеналь юстиция” гомумроссия конференциясе Россиянең балигъ булмаганнар тарафыннан кылынган хокук бозу эшләрен тикшерерлек судлар системасын оештыру мәсьәләләренә багышланды.Илнең 50 төбәгеннән җыелган юристлар, хокук сагында торучылар, суд корпусы вәкилләре, социаль тармак хезмәткәрләре Россиядә ювеналь юстиция үсешенең чынбарлыгы һәм перспективалары һәм пробация хезмәтләрен оештыру турында фикер алыштылар.

Конференцияне ачып, Иҗтимагый палатаның Хокук саклау органнары эшчәнлеген иҗтимагый контрольдә тоту һәм суд-хокук системасын үзгәртеп кору комиссиясе рәисе Анатолий Кучерена: “Россиядә ювеналь юстициянең аякка басуы бик авырдан бара. Кайбер төбәкләрдә, мисалга, Ростов өлкәсендә ювеналь мәхкәмә нигезләрен барлык хокук саклау һәм суд органнарына нәтиҗәле кертү мөмкинлеген бирә торган ведомствоара һәм иҗтимагый үзара бәйләнешнең тулы бер системасы булдырылган. Калган төбәкләргә килгәндә - аларда иң яхшы очракта да ювеналь юстиция хакында бары ишетеп кенә беләләр”,- дип белдерде.

Үз чиратында Иҗтимагый палата әгъзасы Олег Зыков хакимиятнең федераль дәрәҗәдә ювеналь судлар системасын оештырырга бик ашыкмавына сылтады. “Төбәкләр үзләрендә махсуслаштырылган судларны оештырырга күптән әзер, күбесе исә озак вакытлар дәвамында әлеге юнәлештә шактый нәтиҗәле эшчәнлек күрсәтә. Әмма безгә билгесез сәбәпләр аркасында ювеналь юстицияне гамәлгә кертү хакындагы закон проекты һаман да кабул ителмәгән”. Хокук саклау оешмаларының уртак көчләре белән иртәме-соңмы балигъ булмаганнар хокукын яклауга юнәлдерелгән тиешле закон проектының кабул ителү мөмкинлеге дә юк түгел.

Иҗтимагый палатаның Матбугат хезмәте хәбәр итүенчә, конференция нәтиҗәләре буенча Балигъ булмаганнар эшләре буенча судьялар ассоциациясен оештыру карары кабул ителде.