Төбәкләргә сүз бирәчәкләр

Кичә Дәүләт Думасына Гражданнар кодексының дүртенче өлешендәге 1473 статьясына төзәтмәләр кертү проекты кертелде. Алар нигезендә компанияләргә фирма исемнәрендә Федерация субъектларының рәсми исемнәрен яки аларның ясалмаларын җирле хакимиятнең махсус рөхсәтеннән башка куллану тыела. Проектның инициаторы – “Бердәм Россия” депутаты Илдар Гыйльметдинов аңлатмада белдергәнчә, төбәкләрнең үз исемнәрен яклау хокукы булырга тиеш. Аның фикеренчә, рөхсәтне эшчәнлекләре төбәк өчен зур әһәмияткә ия булган юридик затлар, уникаль товарлар җитештерүче һәм төбәкне дөнья базарында танытучы компанияләр алырга мөмкин. Проектта күрсәтелгәнчә, рөхсәт алмаганнар өч ай эчендә исемнәрен үзгәртергә тиеш булачаклар. Дәүләт Думасы аппараты хезмәткәре тәгаенләгәнчә, документ Татарстанның Юстиция министрлыгы белән берлектә эшләнгән. Республиканың Юстиция министрлыгы хезмәткәре моны раслады һәм әлеге өлкәне җайга салу зарурлыгы коммерция компанияләренең исемнәрендә төбәк исемнәренең, шул исәптән Татарстанның популярлыгы арту белән аңлатыла дип белдерде. Әмма моңа карап бу аларның әһәмияте һәм эш сыйфатына, үзенчәлекләренә туры килеп бетмәскә мөмкин. Рөхсәт түләүле нигездә бирелү мөмкинлеге дә юк түгел. Дәүләт Думасының Законнар чыгару комитеты рәисе Павел Крашенинников закон проектын, эшләнеп бетмәсә дә, перспективалы дип саный һәм көзге сессиядә үк кабул ителергә мөмкин дип уйлый. Исемнәрнең дөреслеген теркәү органнары күзәтә һәм компанияләр оештыру документларын үзгәрткән саен фирма исемнәрен законга тәңгәлләштерергә тиешләр.

2008 елдан Гражданнар кодексы компанияләргә исемнәрендә төрле дәүләтләрнең тулы яки кыскартылма исемнәрен, шулай ук аларның ясалмаларын куллануны тыйган иде. Мисалга, “Россия” сүзенә рөхсәтне ил хөкүмәтеннән алырга мөмкин. Әлеге сүз Россия Саклык банкы, “Аэрофлот – Россия һава юллары” һәм “Нестле Россия” исемнәрендә очрый. Unilever компаниясе исә 2008 елның февралендә үз вәкиллегенең исемен “Юнилевер СНГ” дан “Юнилевер Русь”ка үзгәртергә мәҗбүр булды. “Юнилевер Русь” ның корпоратив мөнәсәбәтләр буенча директоры Ирина Бахтина белдергәнчә, исемне алмаштыру ихтыяҗы Союздаш дәүләтнең исемен куллануга рөхсәтне бирүче оешманың Гражданнар кодексында төгәл күрсәтелмәве белән бәйле. Исемне алмаштыру белән бәйле чыгымнар хакында ул әйтмәде, шулай да, исемне алмаштыру аркасында түләү документларының реквизитларын алмаштыру сәбәпле документлар әйләнешендә вакытлы өзеклекләр булып алган. Товарларның төргәгендәге мәгълүматны да бер көн эчендә алмаштыру мөмкин түгел иде, шул сәбәпле компаниягә юридик затның элеккеге исемен каплап ябыштыра торган стикерлардан файдаланырга туры килгән. “Ведомости” үткәргән сораштырулар нәтиҗәсендә шуны әйтеп була, исемнәре төбәк исемен үз эченә алган компанияләр яңа төзәтмәләр кабул ителгән очракта закон нигезендә эш итәргә җыеналар.