Медведев Дәүләт Думасына җирле үзидарә органнарына 18 яшьтән сайланырга мөмкинлек бирүче законга төзәтмәләр проектын кертте

Россия Президенты Дмитрий Медведев җирле үзидарә органнарына 18 яшьтән сайлана алу хокукын билгеләүче закон проектын РФ Дәүләт Думасына юнәлдерде.

Федераль закон проекты Россия Федерациясе гражданнарына җирле үзидарә органнарына  сайланырга мөмкинлек бирүче яшькә кагылышлы өлештәге сайлау законнарының нигезләмәләрен ачыклауга юнәлдерелгән.

“Россия Федерациясе гражданнарының сайлау хокуклары һәм референдумда катнашу хокукларының төп гарантияләре турында” Федераль законның 4 статьясы, конституция (устав), Россия Федерациясе субъекты законы нигезендә билгеле яшькә җитү белән бәйле пассив сайлау хокукларын гамәлгә ашыруның өстәмә шартлары билгеләнергә мөмкин. Җирле үзидарә органнарына сайланганда кандидатның билгеләнгән иң түбән яшь чиге 21 яшьтән артмаска тиеш.

Россия Федерациясе субъектларының законнары анализы күрсәткәнчә, күпчелек төбәкләрдә 21 яшь тулу Россия Федерациясе гражданына муниципаль берәмлекләрнең вәкиллекле органнарына депутат булып сайлануга һәм җирле үзидарәнең сайлаулы вазыйфаи затлары булуга кандитат буларак билгеләнә алу хокукын бирә. Әлеге ысул өлешчә “Россия Федерациясе гражданнарының җирле үзидарә органнарына сайлау һәм сайлануның конституция хокукларын тәэмин итү турында” Федераль законга кушымтаның 3 статьясындагы норма барлыгы белән бәйле. Аның нигезендә, закон проектына бергә теркәп җибәрелә торган документларда әйтелгәнчә, җирле үзидарәнең вәкиллекле органы депутаты һәм җирле үзидарәнең сайлаулы вазыйфаи заты тарафыннан 21 яше тулган Россия Федерациясе гражданы сайланырга мөмкин.

Закон проектында  формалашкан тәҗрибәне үзгәртү һәм муниципаль берәмлекнең вәкиллекле органына депутат булып 18 яше тулган Россия Федерациясе гражданы сайланырга мөмкин дип тәгаен билгеләү тәкъдим ителә. Җирле үзидарәнең сайлаулы вазыйфаи заты булып сайланырга мөмкинлек бирүче яшькә карата хәзерге вакытта гамәлдә булган җайга салу саклана - әлеге яшь Россия Федерациясе субъектларының законнары нигезендә билгеләнә, шул ук вакытта кандидатның иң түбән яшь чиге 21 яшьтән артмаска тиеш.