Пермь депутатлары баланы карау вакытын 4,5 елга кадәр арттырырга тәкъдим итәләр

"РФ хезмәт пенсияләре турында” Законга төзәтмәләрне пермь парламентарийлары Дәүләт Думасына керттеләр.

Хәзерге законнар буенча иминият стажына хезмәт еллары белән бер тигез дәрәҗәдә ата-ананың берсенә балага яшь ярым булганчы һәр баланы тәрбияләү вакыты исәпләнәчәк. Ләкин стажга баланы карауның өч елдан артык булмаган вакыты гына исәпләнәчәк. Ягъни өченче һәм аннан соңгы бала туган очракта иминият стажы барыбер артмаячак.

Пермь депутатлары әйтүенчә, мондый норма туучанлыкны арттырырга ярдәм итмәячәк. Хәзерге законнар гаиләдә бары тик бер яки ике бала тууны гына стимуллаштыра. Пермь статистикасы мәгълүматлары раслаганча, соңгы елларда туучанлык артуына карамастан төбәктә халыкның табигый кимүе саклана. Соңгы ун еллыкта Кама Буе халкы  17-19 мең кешегә кимеде, бары тик соңгы ике елда гына табигый кимү җиде мең тәшкил итте.

Закон проекты иминият стажына кертелә торган баланы карау вакытын дүрт ел ярымга кадәр арттырырга тәкъдим итә.

- Шушы вакыт эчендә ана яки ата эш белән тәэмин итүчедән яки дәүләттән пособия ала алачак һәм хезмәт стажы барачак,-дип аңлатты “РГ”  корреспондентына Пермь өлкәсе Законнар чыгару җыенының социаль сәясәт комитетының беренче урынбасары Сергей Клепцин. – Бу дәүләт тарафыннан аталык һәм аналыкның иҗтимагый кыйммәтен тану шәһадәтнамәсе, шулай ук демографик хәлне яхшырту чарасының берсе булачак. Гаиләләрнең өченче баланы табуга өстәмә стимулы барлыкка киләчәк. Әлегә күп кенә әниләр балаларына яшь ярым булу белән эшкә чыгарга ашыгалар, чөнки аларга башка түләмәячәкләрен һәм бала белән үткәрелгән айлар хезмәт стажына кермиячәген беләләр. Безнең закон проекты хупланса, аналарның сайлау мөмкинлеге барлыкка киләчәк – эшкә чыгаргамы яки 4,5 ел пособиягә яшәргәме.

Әлбәттә, әлеге төзәтмәләрне гамәлгә ашыру өстәмә чыгымнар таләп итәчәк. Алдагы финанс-икътисадый дәлил нигезендә РФ Пенсия фондына иминият түләүләрен кайтару өчен федераль бюджет чыгымнары елына якынча 268 миллион сум тәшкил итәчәк. Ләкин хәзер демографик өстенлек мөһимрәк дип уйлыйлар пермь депутатлары.