РФ Юстиция министрлыгы " Россия Федерациясендә түләүсез юридик ярдәм системасы турында" федераль закон проектын бастырып чыгарды

РФ Юстиция министрлыгының рәсми сайтында "Россия Федерациясендә түләүсез юридик ярдәм системасы турында" федераль закон проекты дөнья күрде. 

Документ нигезендә, дәүләт юридик бюролар Россиянең һәр субъектында ачылачак. Аларның хезмәткәрләре, бюджет ставкасындагы тәҗрибәле юристлары, аз милеклеләргә, эшләмәүче пенсионерларга, инвалидларга, ветераннарга, күп балалы ата-аналарга, ятим балаларга һәм башка социаль төркемнәргә бушлай консультация бирәчәкләр. Әлеге бюроларга мөрәҗәгать итәргә мөмкин булган сораулар төркеме бик күп төрле. Бу хезмәт, гаилә, торак, җир, салым законнары, социаль тәэмин итү мәсьәләләре, күчемсез милек белән килешүләр төзү һәм аларны өзү, кулланучылар хокукын яклау, кредитлар түләү, милекчелек хокукы һәм башкалар буенча консультацияләр.

Дәүләт юридик бюро хезмәткәрләре бары тик җинаять судопроизводствосы белән бәйле мәсьәләләр буенча консультация бирмәячәк. Шулай ук әлеге бюроларда гаризалар, ходатайстволар һәм хокукый характердагы башка документларны төзегәндә ярдәм күрсәтәчәкләр. Юристлар кирәк вакытта граждан судопроизводствосында граждан мәнфәгатьләрен яклаячаклар.