Административ хокук бозулар турында ТР Кодексында үзгәрешләр хакында

2007 елның 8 ноябрендә Татарстан Республикасы Президенты “Административ хокук бозулар турында Татарстан Республикасы Кодексының 2.9 һәм 3.6 статьяларына үзгәрешләр кертү хакында” 49-ТРЗ номерлы Татарстан Республикасы Законына кул куйды.

Югарыда күрсәтелгән Закон нигезендә Кодексның 2.9 статьясындагы үзгәрешләр гражданнар тәкъдимнәрен, гаризаларын яки шикаятьләрен карап тикшерүнең билгеләнгән тәртибен Татарстан Республикасы дәүләт хакимияте органнарының һәм җирле үзидарә органнарының вазыйфаи затлары бозган өчен җаваплылык турындагы нормалар тәгаенли. Статьяның яңа редакциясендә каралганча, җаваплылык гражданнар мөрәҗәгатьләре турында Татарстан Республикасы законнарын бозган өчен билгеләнә.

Кодексның 3.6 статьясындагы үзгәрешләр муниципаль берәмлекләрнең территорияләрен төзекләндерү кагыйдәләрен бозган өчен җаваплылык турындагы нормаларны тәгаенлиләр. Законнарда каралган җирле үзидарә вәкаләтләреннән чыгып, үзгәрешләр Кодексның беренче редакциясендә каралган муниципаль районнарны төзекләндерү кагыйдәләрен бозган өчен түгел, ә җирлекләрне төзекләндерү кагыйдәләрен бозган өчен җаваплылыкны билгели.

Күрсәтелгән закон рәсми басылып чыккан көненнән соң ун көн узгач көченә керә (“Ватаным Татарстан”, 2007 елның 14 ноябрендәге 231 саны).