Юстиция министры М.М.Корманов дәүләт телләре турында закон кабул ителүгә багышланган конференциядә катнашты

Бүген “Казан” ММҮдә “Татарстан Республикасы һәм Россия Федерациясендә хәзерге замандагы тел процесслары: телләр турында законнарның эшләве” дигән “Татарстан Республикасының дәүләт телләре һәм Татарстан Республикасында башка телләр турында” Татарстан Республикасы Законы кабул ителүнең 15 еллыгына багышланган Бөтенроссия фәнни-гамәли конференциясе булды.

Конференцияне ТР Дәүләт Советы, ТР Министрлар Кабинеты, ТР Фәннәр академиясенең Г.Ибраһимов исемендәге Тел, әдәбият һәм сәнгать институты оештырдылар.

Мәсьәлә турында фикер алышуларда ТР Дәүләт Советы Рәисе урынбасары Р.А.Ратникова, ТР Мәгариф һәм фән министрлыгы Н.М.Вәлиев, ТР ФАның Г.Ибраһимов исемендәге Тел, әдәбият һәм сәнгать институты директоры К.М.Миңнуллин, Мәскәү, Казан, Чабаксар, Уфа, Алабуга, Чаллы, Төмән һәм башка шәһәрләрдән галимнәр катнаштылар. Пленар утырышта “Татар теленең конституциячел хокукый статусы” дигән доклад белән Татарстан Республикасы юстиция министры, ю.ф.к. М.М.Корманов чыгыш ясады.

Конференциядә катнашучылар секцияләргә бүленеп эшләделәр. Татарстан Республикасында һәм Россия Федерациясендә телләр законнарының норматив хокукый базасын булдыру проблемалары, шулай ук аны гамәлгә кую механизмнары турында фикер алышынган 1 нче секция эше белән ТР Юстиция министрлыгының эшләр идарәчесе С.А.Брусов җитәкчелек итте.